Pagkaplag og Kalinaw
“Palihog tabangi ako nga dili kaayo mobati og kamingaw.”
Naningkamot si Molly nga dili mohilak samtang siya nanamilit sa iyang igsoong babaye, si Macy. “Gihigugma ko ikaw!” Miingon si Molly. Siya hugot nga migakos ni Macy.
“Magkita kita sa pipila ka bulan,” miingon si Macy. Si Macy mobiya na sa panimalay aron moeskwela og kolehiyo karon. Usa sa mga igsoong lalaki ni Molly tua na sa kolehiyo. Ang lain pa niyang igsoong lalaki nagmisyon. Mingawon kaayo si Molly nilang tanan!
Migunit og hugot si Mama sa kamot ni Molly. Nagtan-aw sila nga midrayb palayo si Macy. “Kita mingawon kaniya,” miingon si Mama. Dihay mga luha sa iyang mga mata.
Mibalik og sulod si Molly sa balay. Miadto siya sa bakante nga kwarto ni Macy ug gisirad-an ang pultahan. Dayon milingkod siya sa higdaanan ni Macy ug misugod sa paghilak.
Adunay tawo nga nanuktok sa pultahan. Misulod si Mama ug Papa. Sila migakos ni Molly. Nanglingkod silang tanan sa higdaanan ni Macy hangtod nga nauga na ang mga luha ni Molly.
“Nasayod ko nga naguol ka nga wala na si Macy,” miingon si Papa. “Unsa kaha kon kitang pamilya mag-ampo? Makahangyo kita sa Langitnong Amahan sa pagtabang kanato nga mobati og mas maayo. Palihog mahimo bang ikaw ang mag-ampo, Molly?”
“OK.” Giduko ni Molly ang iyang ulo. “Langitnong Amahan, kami nagpasalamat Kanimo alang sa tanan sa among pamilya—alang ni Will, Parker, Macy, ako, ug ni Mama ug ni Papa. Nagpasalamat kami Kanimo nga kami mahimong pamilya hangtod sa kahangtoran. Palihog tabangi kami nga mobati og kahupay. Ug tabangi ako nga dili kaayo mobati og kamingaw.”
Gimingaw si Molly sa pagpakig-estorya ni Macy sa tingkatulog. Apan nasayod siya nga ang Langitnong Amahan nakadungog sa iyang mga pag-ampo. Nasayod siya nga Siya makatabang niya nga moarang-arang ang bation.
Pagksunod buntag, ang balay ni Molly hilom kaayo! Gimingaw siya sa pagkinataw-anay uban ni Macy samtang sila nangandam alang sa eskwelahan. Gimingaw siya sa ilang dungan nga pagpamahaw ug panag-estoryahay. Usahay si Macy mosulti niya mahitungod sa unsay iyang nakat-onan sa seminary. Kanunayng bation ni Molly ang kamalinawon kon maghisgot sila mahitungod sa ebanghelyo.
Mao ra kadto! Adunay ideya si Molly.
Nangandam si Molly alang sa eskwelahan. Dayon nakit-an niya si Mama.
“Kumusta, palangga.” Gigakos siya ni Mama. “Andam na ka sa eskwelahan?”
“Mahimo ba kita nga magbasa og usa ka pakigpulong sa komperensiya sa dili pa ko mobiya?” Mihangyo si Molly. “Tingali makatabang kini nako nga moarang-arang ang pamati.”
Mipahiyom si Mama. “Nindot kana nga ideya.”
Nagpuli-puli sila sa pagbasa og usa ka pakigpulong sa kinatibuk-ang komperensiya mahitungod sa kahupay. Ganahan si Molly mogahin og panahon uban ni Mama. Nindot pamation ang magbasa kauban kaniya.
Sa dihang nahuman na sila, mipahiyom si Molly. “Ato kining buhaton pag-usab!”
Gimingaw gihapon siya nilang Macy, Will, ug Parker. Apan mibati siya nga minus na ang iyang kamingaw. Gitubag ang iyang pag-ampo! Makagahin siya og panahon uban sa iyang mama ug papa. Ug ang mga pulong sa mga propeta makatabang kaniya nga makakaplag og kalinaw.
Mga paghulagway pinaagi ni Liz Brizzi