Ang Cake ug ang Pagkamabination
Sa unsang paagi nga si Juli mahimong mabination ngadto sa iyang iyaan kon siya panagsa ra kaayo nga makig-istorya kaniya?
Milingkod si Juli uban sa iyang higala nga si Sarah diha sa kan-anan sa eskwelahan.
“Nabalaka ko kabahin sa pag-uli ug makita ang akong tíya,” miingon si Juli.
“Imong tíya?” Nangutana si Sarah.
“Oo, akong iyaan. Si Tiya Jenny,” miingon si Juli. “Mobisita siya og dugay-dugay. Ug naghunahuna ko nga dili kaayo siya ganahan nako. Istrikta gyod siya, ug dili siya mopahiyom. Bisan og mopahiyom pa ko niya. Dili lang ko gusto nga masuko siya.”
“Maayo na lang kay mipahiyom ka,” miingon si Sarah. “Ang pagminaayo kanunayng makatabang.”
Sa tibuok adlaw nagsige og hunahuna si Juli mahitungod sa unsay gisulti ni Sarah.
Tingali puede ko nga mas magminaayo ni Tiya Jenny, naghunahuna siya. Mao kana ang buhaton ni Jesus. Apan si Tiya Jenny Kinatsila lang ang sinultihan. Makasabot si Juli og pipila ka Kinatsila, apan dili kaayo siya makasulti niini. Sa unsang paagi nga si Juli mahimong mabination ngadto sa iyang iyaan kon siya panagsa ra kaayo nga makig-istorya kaniya?
Si Mama kanunayng moingon nga mopasensiya sa mga tawo nga dili nimo masabtan. Nag-ampo si Julie sa hilom. Langitnong Amahan, palihog tabangi ko nga mopasensiya ni Tiya Jenny. Ug tabangi ko nga makabaton og kaisog sa pagsulti og Kinatsila uban kaniya.
Sa dihang si Juli nauli gikan sa eskwelahan, nakakita siya og usa ka kard diha sa lamesa. Siya mipunit niini. Para kadto ni Mama ug Papa. Hala! naghunahuna siya. Karon mao ang ilang anibersaryo. Nalimot gyod ko!
Gusto si Juli nga mobuhat og usa ka butang nga maayo alang ni Mama ug ni Papa. Apan wala siya makahibalo kon unsa ang buhaton.
Nakita niya si Tiya Jenny nga nagtan-aw libot sa kusina.
“Uh… todo bien [maayo ra ba ang tanan]?” Nangutana si Juli. “MAAYO ra ba ang tanan?”
“Oo,” miingon si Tiya Jenny. Dayon paspas kaayo siyang misulti sa Kinatsila. Nakadungog si Juli niya nga nangutana kon ocupada—busy ba siya.
“Dili, yo no… ocupada. “Dili ko busy,” miingon si Juli. Mibati siya nga naulaw gamit ang iyang salikwaot nga Kinatsila. Apan si Tiya Jenny mipahiyom. Misulti siya og mas hinay aron makasabot si Juli. Miingon siya nga gusto niya nga maghimo og cake para sa anibersaryo ni Mama ug Papa, apan nagkinahanglan siya og tabang.
“Motabang ko nimo!” Miingon si Juli. “Vamos! Sige na.” Mao na kini ang iyang higayon nga makahimo og usa ka butang alang ni Mama ug Papa! Ug aron maila-ila ang iyang iyaan.
Si Tiya Jenny ug si Juli miadto sa kusina. Migamit sila og sinyas sa kamot ug yanong Kinatsila aron magkaistorya. Gipakita ni Tiya Jenny kang Juli kon unsaon sa paghimo og checkered nga chocolate-vanilla cake. Mitabang si Juli sa pagsukod sa harina ug asukal. Gihiwa usab niya ang mga strawberry nga ibutang sa ibabaw. Wala madugay ang cake anaa na sa hudno [oven]. Nanimaho kini nga lamian!
Lingaw kaayo kadto, naghunahuna si Juli. Apan, samtang nanglimpyo siya, iyang nasindulan ang tulo ka itlog diha sa banggira. Nangabuak kini diha sa salog ug ang danlog nga yellow nagkampat.
Mitan-aw si Juli ni Tiya Jenny nga nakulbaan. Masuko ba kaha siya?
Apan si Tiya Jenny mikatawa lang. “Qué desorden!” miingon siya. (“Nagkamuritsing!”)
Wala pa nakakita sukad si Juli ni Tiya Jenny nga mikatawa. Nakapakatawa usab kini niya. Gilimpyohan nila ang hugaw.
Sa dihang nauli na si Mama ug Papa, ang cake andam na. “Malipayong Anibersaryo!” Miingon si Juli.
“Salamat! Lami kaayo kining tan-awon. Ikaw lang ba ang naghimo niining tanan?” Nangutana si Mama.
“Dili, si Tiya Jenny ug ako ang nagtinabangay sa paghimo niini,” miingon si Juli. Mipahiyom siya ni Tiya Jenny. Ug niining higayona, si Tiya Jenny mibalos sa pagpahiyom!
Usa ka mainiton nga pagbati ang milukop sa kasingkasing ni Juli. Malipayon siya nga gitubag sa Langitnong Amahan ang iyang pag-ampo.
Mga paghulagway pinaagi ni Malgosia Piatkowska