Sayop tungod sa Krayola
“Kumusta, Valerie!” Miingon si Lucy. Midagan siya ngadto sa pikas tumoy sa gym aron sa paghimamat sa iyang higala. Siya ug si Valerie makadula samtang ang ilang mga mama nag-abot sa simbahan.
Nakakita si Lucy og pipila ka krayola. Gipili niya ang rosa [pink] nga krayola. Apan wala siyay bisan unsa nga papel nga madrowingan. Mao nga midrowing hinuon siya og rosa nga linya diha sa usa ka lingkoranan. Hayag ug matahom tan-awon ang linya diha sa puthaw. Mitan-aw si Lucy kang Valerie ug miagik-ik.
Mipili si Valerie og tapol [purple] nga krayola. Midrowing siya og kulongon nga porma sa lain nga lingkoranan. Gipuno ni Lucy ug ni Valerie ang duha ka lingkoranan og hayag nga mga marka.
Sa wala madugay miabot si Mama ug nakakita sa mga kuriskuris. “Lucy!” Miingon si Mama. “Nahibalo ka nga sa papel ra ta magkolor!”
Mitan-aw si Lucy sa yuta. Nasayod siya nga ang mga krayola para lang sa papel. Apan sa dihang nagsugod na siya sa pagkolor, siya ingon og … nakalimot.
Gitan-aw niya ang lingkoranan karon. Pipila ka semana ang milabay, ang iyang pamilya mitabang og limpyo sa simbahan. Ganahan siya sa pag-atiman sa balay ni Jesus. Nagmahay siya tungod sa paghugaw-hugaw karong adlawa.
“Dali, mga inday. Limpyohan nato kini,” miingon si Mama. Mikuha siya og pipila ka paper towel. Basa ug sabonon kini.
Gikuskos ni Valerie ug Lucy ang mga marka sa krayola. Sa hinay-hinay, nangatangtang kini.
“Lisod kini,” miagulo si Lucy.
Gipikpik ni Mama ang iyang bukobuko. “Oo, apan mahimo nato kini!”
Magkauban nilang gikuskosan ang mga lingkoranan. Sa kataposan limpyo ug sinaw na ang puthaw.
Mitan-aw si Lucy sa limpyo nga mga lingkoranan ug mipahiyom. Nagmahay siya nga naghugaw-hugaw siya. Apan malipayon siya nga nahimo niya nga mas maayo ang mga butang.
Paghulagway pinaagi ni Mark Robison