Mga Pioneer Sa Matag Yuta
Ang Piano ni Ludovic
Malipayon si Ludovic nga miserbisyo sa Langitnong Amahan.
Gidala ni Ludovic ang pipila ka mapilo nga mga lingkoran ug gikarga kini tabok sa karsada. Dominggo kadto, ug hapit na magsugod ang simba. Ang balay diin sila nagsimba sa Togo walay igong mga lingkoranan. Mao nga kanunayng magdala si Ludovic og mga lingkoranan gikan sa balay sa iyang lolo.
“Nganong mobiya man ka sa nindot nga simbahan aron moadto sa usa ka gamay nga payag?” mitawag ang usa ka tawo ngadto kaniya. “Ang inyong simbahan walay mga bangko man gani!” miingon ang laing tawo, nga nagkatawa.
Nagpakaaron-ingnon si Ludovic nga wala makadungog. Kinahanglan lang akong magpadayon sa pagbuhat sa unsay husto, naghunahuna siya.
Unang nakahibalo si Ludovic mahitungod sa Simbahan sa dihang 10 anyos pa siya. Karon 12 anyos na siya. Siya ug ang iyang pamilya bag-ohay lang nga nabunyagan. Naghupot siya sa pagkapari ug mitabang sa pag-apod-apod sa sakramento. Gitigom gani niya ang pipila sa iyang kwarta para pangpaniudto aron makapalit og pan alang sa sakramento matag semana. Malipayon si Ludovic nga miserbisyo sa Langitnong Amahan.
Sa dihang oras na nga magsugod ang simba, napuno ang gamay nga lawak. Milingkod ang pipila ka tawo diha sa mga lingkoranan nga gidala ni Ludovic. Nagbarog ang ubang mga tawo.
Nagsugod ang miting pinaagi sa usa ka awit. “Israel, Israel, Dios nagtawag,” mikanta si Ludovic. Ganahan siya nga mokanta sa simbahan.
Human sa simba, si Ludovic naghagonghong [hummed] samtang iyang gihipos ang mga lingkoranan. Naghagonghong siya samtang naglakaw pauli. Dayon nakahunahuna siya og ideya! Gipagawas niya ang iyang dulaan nga piano keyboard. Tingali mahimo niyang makat-onan unsaon sa pagtukar ang “Israel, Israel Dios Nagtawag”!
Gihagonghong ni Ludovic ang mga nota ug gitukar ang lainlaing mga key hangtod nga nakuha ang husto niini. Sa wala madugay gitudloan niya ang iyang kaugalingon sa pagtukar sa tibuok awit.
Dayon nakahinumdom siya nga ang iyang pamilya adunay pipila ka rekording sa mga himno sa Simbahan. Gipaminaw niya kini ug nakakat-on sa pagtukar sa ubang mga awit usab. Nagsige og bansay si Ludovic.
“Unsa kaha kon motukar ka sa simbahan samtang manganta kami?” Nangutana ang papa ni Ludovic usa ka adlaw.
Gikulbaan si Ludovic. “Maulawon kaayo ko,” miingon siya. Unsaon nalang kon masayop ko?”
“Nan mopadayon ka,” miingon si Papa. “Mas maayo ka nga piyanista kay sa imong gihunahuna.”
Pagkasunod Dominggo, wala lang magdala og mga lingkoranan si Ludovic. Gidala usab niya ang iyang dulaan nga keyboard ngadto sa simbahan. Sa dihang panahon na alang sa pangbukas nga awit, gikulbaan siyang mibutang sa iyang mga tudlo diha sa mga key. Dayon misugod siya sa pagtukar. Ang tanan midungan sa pagkanta. Ug nindot kaayo kining paminawon!
Mitukar si Ludovic sa simbahan matag Dominggo human niana. Usahay masayop siya. Apan wala siya miundang. Kon ang awit lisod kaayo nga tukaron, mikanta sila nga wala ang piano, ug si Ludovic ang nangulo sa musika.
Mipahiyom si Ludovic. Dili niya igsapayan nga gipahigayon nila ang pagsimba sa balay sa usa ka tawo. Dili gani igsapayan nga ang mga tawo mibugalbugal kaniya. Ang unsay mahinungdanon mao nga si Ludovic migamit sa iyang mga talento sa pagserbisyo sa Dios.
Ang Togo usa ka gamay nga nasod sa kasadpang Africa.
Karon, adunay 21 ka ward ug branch didto.
Ang opisyal nga pinulongan sa Togo mao ang French.
Usa ka misyonaryo mitudlo ni Ludovic sa pagbasa og musika aron mas maayo siyang makatukar sa piano.
Dako na si Ludovic karon. Siya ug ang iyang asawa, si Benedict, parehong ganahan og musika.
Nanag-iya si Ludovic og tinuod nga piano sa panimalay ug motukar sa organ sa simbahan.
Mga paghulagway pinaagi ni Caroline Garcia