Gikan sa Unang Kapangulohan
Pagbuntog sa Inyong mga Hagit
Ni Presidente Dallin H. Oaks
Unang Magtatambag sa Unang Kapangulohan
Ang akong kinadak-ang hagit sa bata pa ko mao ang sa dihang namatay ang akong amahan. Syete anyos pa ko.
Ako adunay buotan kaayo nga inahan ug mabination nga mga apohan. Apan mihilak ko og maayo. Sa eskwelahan ang akong mga kauban sa klase mangantiyaw nako tungod kay ako dili kamao moespeling o dili kaayo kamao sa math. Ang pipila ka mas magulang nga mga bata mopasakit kanako diha sa school bus. Nanghinaot ko nga aduna koy mga talento sama sa uban kinsa mga maayong mga atleta o maayong manganta.
Sa kadugayan, mas miarang-arang na ang akong gipamati. Ang akong pamilya naghigugma ug mitabang kanako. Mipadayon ko sa pagtrabaho ug hinayhinay nga miarang-arang ko sa eskwelahan. Nakaplagan usab nako ang mga butang nga ako maayo. Naningkamot ko aron mahimong mas maayo niadtong mga butanga. Ang Langitnong Amahan mitabang kanako.
Samtang nagkadako kita, kitang tanan adunay mga hagit. Ang pipila kanato makabaton og sakit o usa ka kakulangan. Ang pipila kabos ug dili makakuha og maayong medikal nga pag-atiman o edukasyon. Ang pipila gitratar og dili maayo tungod sa ilang kolor sa pamanit o kon diin sila gikan.
Sa unsang paagi nga inyong mabuntog ang inyong mga hagit?
-
Salig diha sa Langitnong Amahan. Kita mahimong mobati nga mawad-an og kadasig usahay, apan kita kinahanglan gayod mosalig Kaniya. Siya naghigugma sa Iyang mga anak ug misaad sa pagpanalangin kanato.
-
Padayon sa pagpaningkamot. Ang Ginoo nagtudlo kanato nga kitang tanan adunay managlahi nga mga gasa. Kita makadiskobre sa atong kaugalingong mga gasa. Dayon kita makagamit niini aron molambo ang aong kinabuhi ug sa makaserbisyo sa uban.
Dili igsapayan kon unsa ka ngitngit human mosalop ang adlaw, kanunay gyod nga mas hayag kon ang adlaw mosubang na. Tinuod usab kana sa atong mga kinabuhi. Kon ang usa ka dalan gibabagan, kita makapangita og lain. Kon ang mga butang ingon og lisod kaayo, makapadayon kita sa unahan ug molambo niini.
Mosaad ako nga ang Langitnong Amahan motabang kaninyo nga mabuntog ang inyong mga hagit. Siya naghigugma kaninyo ug motabang kaninyo nga mahimong unsay Iyang gusto nga kamo mahimo.
Ako Makabuntog sa mga Hagit
Mga paghulagway pinaagi ni Alyssa Petersen