Ang Pagtiaw-tiaw [Prank] sa Bisikleta
Ang iyang mga higala miingon nga mahimo kining kataw-anan. Apan dili kini maayo pamation.
Mitindak si Sam sa iyang bisikleta kutob sa iyang mahimo pasaka sa bungtod. Iyang gitindogan sa pag-abante. Ang hangin midagpas sa iyang mga buhok. Ang iyang higala si Liam mitindak sunod niya.
“Kapoy na?” Miingon si Liam.
“Wala oi!” Miingon si Sam.
Ang ilang higala nga si Eric tua na sa park sa tumoy sa bungtod.
“Komm schon! Pagdali!” misinggit siya.
Si Sam ug Liam miabot sa tumoy sa bungtod. Giparada sa mga batang lalaki ang ilang mga bisikleta ug nanglingkod ilalom sa punoan sa kahoy.
Mipunit si Liam og usa ka bato ug gilabay kini. “Gilaay man ko.” Walay nay daghang lugar nga kaadtoan sa ilang gamay nga balangay sa Switzerland.
“Ako sab,” miingon si Eric. Iyang gikabkab ang yuta gamit ang usa ka tukog.
“Makapadayon kita sa pagbisikleta,” miingon si Sam.
Gihiwi-hiwi ni Liam ang iyang nawong. “Mao ra kana tanan ang atong mabuhat.”
“Magbuhat ta og butang nga kataw-anan!” Miingon si Eric. Kalit siyang mitindog ug miadto sa butanganan sa bisikleta, diin daghang bisikleta ang giparada. Si Sam ug si Liam misunod kaniya.
Naglain ang pamati sa tiyan ni Sam. Usahay unsay gihunahuna ni Eric ug Liam nga kataw-anan dili kataw-anan ngadto niya. Ganahan si Eric ug si Liam nga manungog sa ubang mga bata ug mosulti og bastos nga mga butang diha sa klase. Apan tingali niining higayona lahi.
Gawas pa, walay daghan nga mga batang lalaki sa klase ni Sam. Kon dili siya makighigala nilang Eric ug Liam, kinsa pa man ang iyang higalaon?
“Atong panangtangon ang mga tabon sa balbola sa tanang ligid,” hunghong pa ni Eric. “Atoa kining tagoan diha sa punoan sa kahoy.” Miluhod siya sa tungod sa sinaw nga pula nga bisikleta ug giliso ang plastik nga tabon sa usa sa mga ligid.
Mikatawa si Liam. “Oo! Kataw-anan kaayo kana.”
Nanghupaw si Sam. Dili diay. Kining higayona dili diay lahi. “Ambot lang,” miingon siya. “Tingali kinahanglan na kita nga manglakaw.”
Giwakli ni Eric ang bukton ni Sam. “Ahh. sige na!,” miingon siya. “Wala man gani bisan usa nga nagtan-aw.”
“Gagmay ra bitaw ni nga mga pisa,” miingon si Liam. “Walay bisan usa gani nga makamatikod nga nawala na kini.”
Naningkamot si Sam sa pagbaliwala sa naglain nga pamati sa iyang tiyan. Ang pagkuha sa mga tabon sa balbola dili makaguba sa mga bisikleta. Gikibo ra niya ang abaga ug mitando.
Ang tulo ka batang lalaki daling mitangtang sa tanang tabon sa balbola sa mga ligid sa bisikleta ug nanagan og balik ngadto sa punoan sa kahoy. Gitagoan nila ang tanang tabon ilalom sa usa ka bato ug nanglingkod aron magtan-aw sa mga bisikleta. Si Liam ug si Eric nag-agik-ik sa pagpangatawa.
Sa wala madugay ang usa ka tawo migawas, miabli sa lock sa iyang bisikleta, ug misakay.
“Tan-awa? Wala gani siya nakabantay,” miingon si Liam.
Apan nakabantay ko, sa hunahuna ni Sam.
Sa tibuok adlaw, si Sam dili makahunong sa paghunahuna mahitungod sa mga tabon sa balbola. Nanghinaot siya nga iyaha kining mahatag og balik, apan wala siyay paagi sa pagpangita sa mga tag-iya sa mga bisikleta. Miluhod siya ug misulti sa Langitnong Amahan mahitungod niini.
“Lain ang akong gibati,” miingon si Sam. “Wala unta gayod nako kadto buhata. Intawon pasayloa ako, Langitnong Amahan.”
Pagkasunod adlaw, si Sam ug ang iyang mga higala nagbisikleta na usab ngadto sa park.
Sa makausa pa, miingon si Eric, “Atong kuhaon ang mga tabon sa balbola!”
Sa makausa pa, miuyon si Liam.
Nakahinumdom si Sam sa iyang pag-ampo. Ug niining higayona, mibati na siya og diyutay nga kaisog.
“Siguro dili kita angay mobuhat niana,” miingon siya.
“Nganong dili man?” Miingon si Liam, nagmug-ot. “Walay nakabantay gahapon.”
“Ako dili gusto nga naay magbinuang sa akong bisikleta,” miingon si Sam. Sa wala pa makatubag ang bisan hain sa mga batang lalaki, misakay siya sa iyang bisikleta. “Maglumba ta padulong sa bakery!” misinggit siya. Dayon misugod siya sa pagtindak og kusog kutob sa iyang mahimo.
Gikuha sab ni Eric ug Liam ang ilang mga bisikleta.
“Dili patas! Nag-una naman ka,” mitawag si Liam.
Mingisi si Sam samtang ang iyang mga higala migukod kaniya. Mihunghong siya og pasalamat ngadto sa Langitnong Amahan. Mas maayo na ang iyang gibati.
Paghulagway pinaagi ni Shane Clester