O se Vaega e Fai
“E i ai sa’u vaega faapitoa mo oe,” na fai atu ai Sister Fox.
Sa tele ina talanoa tamaiti i le vasega a Capri. Sa latou fiafia e faamatala i le tasi ma le isi e uiga i lo latou vaiaso. Sa latou fiafia e tali fesili i le lesona.
Ae le o Capri. Sa le mafai ona tautala o ia. Sa ia te ia se manaoga faapitoa lea na faigata ai ona tautala.
I se tasi Aso Sa, sa maua ai e Sister Fox se tala fiafia. “O le a oo mai le polokalama a le Peraimeri,” o lana tala lea. “O le a tofu outou ma se vaega.”
Na tuuina atu e Sister Fox ni fasipepa i isi tamaiti. Sa tofu pepa taitasi ma se laina mo i latou e fai atu. Ae sa le mafai e Capri ona fai atu upu. E mafai faapefea ona i ai sana vaega i le polokalama?
“E i ai sa‘u vaega faapitoa mo oe,” na fai atu ai Sister Fox ia Capri. Sa ia uu i luga se tamai pusa. Sa i ai sina ’au laitiiti e lala mai i fafo i le isi itu. “Matamata i le mea lenei.” Sa faataamilo e Sister Fox le ’au ma faataamilo. Sa tata mai le pusa se musika.
Sa patipati lima o Capri. Sa ia iloaina lena pese!
Na ataata Sister Fox. “Ia, faataitai oe! Sa fesoasoani o ia ia Capri e faataamilo le tamai ’au. Na taina le musika. Sa pei o se mea faamaneta!
“E mafai ona e taina lenei pese mo i tatou i le polokalama a le Peraimeri?” Sa fesili atu ai Sister Fox. Sa lue atu le ulu o Capri. Sa fiafia o ia i le i ai o sana vaega.
E le’i umi ae oo i le aso o le polokalama. Sa taitoatasi ona savavali atu tamaiti taitasi i luma e fai a latou vaega.
“E alofa le Atua ia i tatou,” o le tala lea a Allie.
“O le Atua o lo tatou Tama Faalelagi,” o le tala lea a Zac.
Ona oo lea i le taimi o Capri. Sa savali atu o ia i luma. Ona ia faataamilo lea o le ’au laititi i luga o le pusa. Sa tata le musika malu. Sa mafaufau Capri i upu o le pese i lona mafaufau a o ia taina.
O a’u o se atalii o le Atua,
ua Ia auina mai a’u nei,
Ia ou nofo ai i lenei lalolagi,
ma matua agalelei.
Sa tilotilo atu Capri i tagata uma. Sa latou ataata atu ia te ia.
I le faaiuga o le polokalama, sa saunoa ai le epikopo. “Sa faasoa mai e tamaiti taitoatasi a latou molimau i le asō,” na ia fai atu ai. “O mea na latou faasoa mai e moni. O i tatou uma lava o fanau a le Atua.”
Sa lagona e Capri le mafanafana i lona loto. Sa ia iloa e sa‘o le epikopo. O ia o se afafine o le Atua. Ma sa i ai sana vaega taua e fai.
Ata na tusia e Conner Gillette