O Paionia i Atunuu Uma
Ua Feiloai Harriet i Faifeautalai
Pe mafai ona toe faatasi o ia ma Papa?
Sa sioa atu Harriet i le ata o Papa i luga o le puipui. Ua valu masina talu ona maliu o ia. Sa mafaufau o ia pe mata o le a ia toe vaai ia te ia. Sa ia matua misia lava o ia.
Tuitui , tuitui , tuitui .
Sa tatala e Harriet le faitotoa o le la[ok] tamai fale mautotogi. Sa tutu i fafo ni alii talavou se toalua.
“Guten Tag! Talofa lava! O i ma’ua o faifeautalai mai Le Ekalesia a Iesu Keriso o le Au Paia o Aso e Gata Ai Ma te fiafia e talanoa i lou aiga e uiga ia Iesu Keriso.”
Sa ataata Harriet. O se mea e uiga i mea na la fai mai ai na maua ai e ia se lagona lelei i totonu. “O le a ou fesili ia Mutti (Tina).”
Na maua e Harriet ia Mutti. “O loo i ai faifeautalai i le faitotoa,” o lana tala lea. “La te fia talanoa mai ia i tatou e uiga ia Iesu.”
Sa faauu Mutti. “Ta‘u atu ia i la’ua e leai so tatou taimi.”
“Ae e foliga mai e lelei tele i laua,” o le tala lea a Harriet. “O le a le umi.”
Sa tilotilo atu Mutti i le uati. “Ia Ua Lelei. Mo ni nai minute.”
Sa o mai faifeautalai i totonu ma talanoa ia Mutti, Harriet, ma le uso o Harriet, o Carmen. Sa la ta‘u atu ia i latou e uiga ia Iesu ma se tusi e igoa o das Buch Mamona, o le Tusi a Mamona. Ona la tuuina atu lea i le aiga o Harriet se kopi e faitau ai.
“Ou te matea e mafai ona matou faitauina ni nai itulau,” o le tala lea a Mutti, ma tatala le tusi. I nai aso na sosoo ai, sa faaauau pea ona faitau ma faitau Mutti. Sa ia faitau leotele atu ni vaega ia Harriet ma Carmen.
Maimau pe ana mafai ona faitau e Papa lenei mea. O le a ia fiafia i ai, sa mafaufau ai Harriet.
Ina ua toe foi mai faifeautalai, sa la aoao atu e uiga i le fuafuaga a le Atua. “Sa tatou ola faatasi ma le Atua ae tatou te le’i fananau mai. Sa tatou o mai i le lalolagi e aoao ma avea e faapei o Ia. Pe a tatou oti, e mafai ona tatou toe faatasi ma Ia.”
Ae a Papa? Sa mafaufau ai Harriet.
Sa tilotilo atu le faifeautalai ia Harriet. “Ona o Iesu na maliu ma toe soifua mai, e mafai ona tatou faatasi ma o tatou aiga e faavavau. E oo lava i e pele ua maliliu.”
Sa lagona e Harriet le tele o le faamoemoe. E mafai ona toe faatasi o ia ma Papa! Sa ataata tele foi Mutti—o le taimi muamua lea i se taimi umi lava.
Sa faaauau pea ona aoao Harriet, Mutti, ma Carmen mai faifeautalai. Sa latou o i le lotu. Na avea Harriet ma se uo i se tamaitiiti lelei e igoa ia Dieter.
O lea la ua lagona le fiafia i le fale mautotogi o Harriet e pei ua susulu mai le la i potu uma. E le’i umi ae filifili Harriet ma lona aiga e papatiso.
O le po a o lumanai lo latou papatisoga, sa tootutuli ai Harriet ma Mutti ma Carmen e tatalo. “Tama Faalelagi,” na fai atu ai Harriet, “matou te faafetai tele mo faifeautalai, le talalelei, ma lo matou aiga. E le mafai ona matou faatali ina ia papatisoina.
Ina ua pupula mata o Harriet, sa ia tilotilo atu i le ata o Papa ma ataata. Sa le mafai ona faatali o ia e toe vaai ia te ia i se aso.
E lua malumalu i Siamani.
O le tasi vaetolu o Siamani ua lilofia i vaomatua.
E faasoa atu e Siamani se tuaoi ma atunuu e iva.
Ina ua matua Harriet, sa ia faaipoipo atu i le tama lelei e igoa ia Dieter.
O Dieter ua avea nei ma se tasi o Aposetolo—Elder Dieter F. Uchtdorf!
Fai mai Elder Uchtdorf o Harriet o “le la susulu o [lona] olaga.”
Ata na tusia e Giovanni Abeille