Na O Se Vaega Lava e Tasi?
Sa faigata ia Todd ona nofo filemu i le taimi o le sauniga faamanatuga. Sa ia faalue ona vae. Sa ia feminoiai i lona nofoa.
Sa fiafia Todd e nofo i luga o vae o Tama i le lotu. Ae o Tama ua alu ese mai le taulaga i le asō. “Todd,” sa musumusu atu ai Tina. “Ua oo i le taimi e migao ai i le taimi o le faamanatuga.” Na ia tuuina atu ia te ia se kopi o le Uo.
Sa tilotilo atu Todd i ata. Ae e le’i umi ae lelava o ia i le nofo filemu. Sa ia uuina le lima o lona tuafafine pepe, o Sara. Sa ia aui ona tamai lima faataamilo i ona tamai lima. Sa ataata Todd.
E le’i umi ae pasi atu le fata falaoa ia te ia. Sa fia ai Todd. Sa ia faaaogaina uma lima e uu mai ai le tele o falaoa. Sa faauu Tina. Sa ia fai atu, “O le isi taimi, na o le tasi lava e ave.”
Ina ua mae’a le sauniga, sa ataata Tina ia Todd. “Faafetai mo le fesoasoani atu ia Sara a o toesea Tama.”
Sa fiafia Todd e fesoasoani ia Tina i le lotu. Sa ia mafaufau i falaoa uma sa ia avea.
“Ou te faamalie atu sa ou aveina le tele o falaoa. Aisea e na o le tasi ai tatou te avea?” na ia fesili ai.
Sa fusi e Tina ia Todd. “Tatou te le aia le falaoa ona ua tatou fia aai. Tatou te aia le falaoa ina ia manatua ai Iesu. Ma e na o le tasi le vaega tatou te aia ina ia mafai ai e tagata uma ona i ai se fasi vaega e manatua ai Iesu.”
Sa taumafai malosi Todd ia migao i le taimi o le lotu i le vaiaso na sosoo ai. Sa na o le tasi le fasi falaoa na ia aia. Sa fiafia o ia sa mafai ona ia manatua Iesu. Sa manao o ia e fesoasoani i isi ia manatua foi Iesu.
Ata na tusia e Kevin Fales