“O le a lena Pese?”
O pesepesega na fesoasoani e aluese ai le fefe o Caleb.
Sa talotalo faatofa atu Caleb ia Tina. O ia ma lona uso ma lona tuafafine o le a nonofo mo se vaiaso atoa i le fale o le tuafafine o lona tama. Sa le’i mamao tele mai le mea sa nonofo ai le aiga o Caleb i Filipaina, ae sa pei lava o se malaga suesue. O le a latou maua le fiafia tele!
Sa latou o uma i totonu o le taavale. Sa momoli atu i latou e Tama i le fale o lona tuafafine. Sa tamoe atu Caleb e tuuina atu i le tuafafine o lona tama ma lona tausoga se opo lapoa.
“Sa ou misia oe!,” o lana tala lea.
Na ataata le tuafafine o lona tama. “Sa ou misia foi oe! O mai loa, sa ou faia ni meaai mo outou.”
Mo aso e lua, sa taaalo ai Caleb ma ona tei ma lona tausoga i le aso atoa. Sa latou taaalo i taaloga vitio. Sa latou tusia ni ata. Sa latou tamomoe atu i fafo. A o le aso tolu, sa le’i lelei ai se faalogona a Caleb. Sa lagona e lona tino le vaivai ma le tiga.
“Ai ua e lelava mai le tele o le taalo,” o le tala lea a le tuafafine o lona tama. Sa ia tuuina atu ia te ia se ipu vai. Sa vave ona moe Caleb.
Ina ua ala a‘e o ia, sa sili atu ona leaga lona faalogona. Sa tau le mafai ona minoi o ia! Sa sosolo atu se pata i ona vae atoa. Sa popole le tuafafine o lona tama. Sa ia valaau atu ia Tina.
E le’i leva ae piki e Tina ma Tama ia Caleb ma ave o ia i le falemai. Sa faia e le fomai ni nai suega. Sa ia ta‘u atu ia i latou sa ma’i Caleb i le dengue fiva. Sa foliga taufaafefe.
“E lelei sa lua aumaia o ia i totonu,” o le tala lea a le fomai. “E tatau ona nofo o ia iinei mo sina taimi ina ia mafai ona matou vaavaaia o ia.”
Sa ave i latou e se tausima‘i i se potu faatasi ma isi tamaiti mama’i e toatolu. Sa fesoasoani Tina ia Caleb e oso i luga o lona moega. Sa ia fusi mau o ia ma fai se tatalo. Ona o ese lea o Tina ma Tama.
Sa fefe Caleb. Sa amata ona ia usuina se pese Peraimeri e fesoasoani ai ia te ia ia maua se lagona lelei.
“Tama Faalelagi, pe o e i ai moni ea iina? “E te faafofoga ma tali i tatalo a tamaiti uma?”
Sa faalogologo isi tamaiti. “O le a lena pese?” sa fesili atu ai se tamaitiiti.
“Sa ou aoaoina i le Peraimeri,” o le tala lea a Caleb. “Ou te maua ai le lagona toa. E faamanatu mai ai ia te a‘u o loo i ai pea le Tama Faalelagi iina mo a‘u.”
“E mafai ona e toe usuina?” na fesili atu ai se teineitiiti. “E matagofie.”
A o toe usuina e Caleb le pese, sa alu ese atu ona popolega.
“O le a le Peraimeri?” na fesili atu ai le isi teineitiiti. Sa ta‘u atu e Caleb ia i latou uma e uiga i le lotu ma le Peraimeri. Sa ia faasoa atu lana molimau i le Tama Faalelagi ma Iesu Keriso.
Sa usuina e Caleb pese Peraimeri i isi tamaiti i aso uma seia oo ina alu o ia i le fale. Sa ia faasoa atu foi tala o tusitusiga paia. Na maua ai e ia se lagona lelei, ma sa ia iloaina na fesoasoani foi ia i latou. Sa fiafia o ia na mafai ona ia faasoa atu le talalelei, e oo lava i le falemai.
Ata na tusia e Maria Mola