Uo i le Uo

E Alofa Se Tasi Ia Te Oe

Saunia e Sister Susan H. Porter

Fesoasoani Muamua i le Au Peresitene Aoao o le Peraimeri

A o o’u agai atu i la‘u galuega fou, sa amata ona ou popole.

Ae faapefea pe afai e le lava lo‘u lelei? Sa ou mafaufau a o o’u tietie atu i le pasi. Ae faapefea pe afai latou te manatu e le mafai ona ou faia se galuega lelei?

Ona ou maua lea o se lagona manino: Faataitai le mea sili e te mafaia. E tusa lava pe le sologa lelei, e i ai se tasi e alofa ia te oe.

Sa ou mafaufau i lo‘u toalua. Sa ou iloa o le a alofa pea o ia ia te a’u e tusa lava pe le sologa lelei la‘u galuega. Ona ou mafaufau lea ia Iesu Keriso. Sa ou iloa o le a Ia alofa pea ia te a’u. Sa mafai ona ou lagonaina i lo‘u loto. Sa ou faia se tatalo faigofie e ole atu ai i le Tama Faalelagi e fesoasoani mai ia te a‘u.

Ina ua ou galue, sa ou faia le mea sili ou te mafaia. A ou faia se mea sese, sa ou taumafai pea. Sa ou manatuaina sa alofa pea se tasi ia te a‘u.

E alofa foi Iesu ia te oe! Ua tatou iloa e alofa Iesu i tamaiti ona o le ala na Ia taulimaina ai i latou. I se tasi aso na aumai ai e nisi o matua a latou fanau laiti e vaai ia Iesu. Ae na fai mai le au soo e le tatau ona latou faalavelave ia te Ia.

E le’i malie i ai Iesu. Sa Ia fai atu i matua e tuu tamaiti e o mai ia te Ia. Ona “siitia lea e ia o i latou i ona lima, ua faaee foi ona aao i luga ia te i latou, ma faamanuia ia te i latou” (Mareko 10:16).

Ia manatua pea e alofa Iesu ia te oe. E alofa foi le Tama Faalelagi ia te oe. E Silafia e Ia lou Igoa. O le a La’ua fiafia e opo ia te oe i o La’ua aao ma faamanuia oe.

E tusa lava pe le lelei mea uma, ia taumafai pea. Tatalo mo se fesoasoani ma faia le mea sili e te mafaia. Manatua, po o le a lava, e i ai se tasi e alofa pea ia te oe.

Ata na tusia e Dani Jones