Uo Totoa
O lenei tala sa tupu i le ISA.
Sa manao Molly ia lototoa e pei o lana uo.
Na tatagi le logo. Sa tuu e Molly ana tusi i lana ato. Ua uma le aoga, ma sa le mafai ona faatali o ia mo le faaiuga o le vaiaso!
“Manatua ia saunia mo au lipoti o talafaasolopito i le Aso Gafua,” o le tala lea a Mr. Miller. “Ia manuia le faaiuga o le vaiaso, vasega.”
Sa tilotilo atu Molly ia Anisha. Sa punou ifo lona ulu i lalo, ma sa foliga popole o ia.
“Ei, Anisha,” o le tala lea a Molly. “O LELEI oe?”
Sa mapu’ea Anisha. “Ua ou fefe e tuuina atu la’u lipoti i le Aso Gafua. Sa ou galue malosi i la’u Igilisi talu ona matou siitia mai iinei. Ae o upu i la tatou tusi o talafaasolopito e faigata ona ou faia.”
Sa mafaufau Molly i lena mea. O le a faigata tele ona siitia atu i se isi atunuu ma aoao ai se gagana fou.
“Mata e fesoasoani pe a ta’ua faataitai faatasi?” o le fesili lea a Molly.
Sa luelue atu le ulu o Anisha. “Ou te fia manao ai. Atonu e mafai foi ona ta suesueina a tatou upu fou.”
“Ioe,” na fai atu ai Molly. “O le a fesoasoani lena ia i ta‘ua uma!”
I le taeao o le Aso Gafua, sa tu ai Mr. Miller i luma o le vasega. “O le a tatou amataina le vasega i le asō i a tatou lipoti.”
Sa liliu atu Molly ia Anisha ma se ataata. Sa toe ataata atu Anisha, ae sa mafai ona iloa atu e Molly le popole i ona mata.
Na tuuina atu e nai isi tagata a latou lipoti. Ona oo lea i le taimi o Anisha. Sa talie tagata a o ia savali atu i luma o le vasega. O nisi o i latou sa tusilima atu ia te ia ma taumusumusu .
Sa manava tele Anisha. O le pepa sa ia uuina sa tetete laititi.
Sa faia e Molly se tatalo le leoa. Tama Faalelagi, faamolemole fesoasoani ia Anisha ia lelei lana lipoti. Ma faamolemole fesoasoani mai ia ou iloa le auala e mafai ona ou fesoasoani ai ia te ia.
Sa fai atu le faiaoga i tamaiti aoga e faalogo lemu. Ae sa faalogoina pea e Molly le taumusumusu. Ina ua taumafai Anisha e fai atu upu faigata, sa talie ni nai tagata. Sa moomoo Molly maimau pe ana mafai ona ia taofia tamaiti mai le talie ma le taumusumusu . Sa ia faamautinoa e ataata i soo se taimi e tilotilo atu ai Anisha ia te ia.
Ina ua mae’a Anisha, sa toe savali atu o ia i lana kesi. Na vaaia e Molly loimata i mata o Anisha. Sa tuu ifo e Anisha lona ulu i luga o lana kesi.
Ona oo lea i le taimi o Molly. Sa savali atu o ia i luma o le potu. “Ae ou te le’i amata, ou te fia faapea atu sa faia e Anisha se galuega maoa’e i lana lipoti.”
Sa ea a’e i luga Anisha.
“Sa na o ni nai masina talu ona nofo o ia iinei, ma ua lelei tele o ia i le faaPeretania. E galue malosi o ia ma e le fiu. Ou te faamoemoe e mafai ona ou lototele e pei o ia.”
Ina ua uma le vasega sa uu mai e Molly ana tusi. Na ia manao e talanoa atu ia Anisha. Ae o le toatele o isi tamaiti aoga ua faapotopoto faataamilo ia Anisha. Sa latou fai atu ni tala lelei ia te ia.
“Lelei tele lau galuega i lau lipoti, Anisha!” o le tala lea a se tasi tamaitiiti.
“O nisi o igoa o tagata ma nofoaga sa faigata tele ona fai atu!” o le tala lea a se isi teineitiiti.
Sa ataata Molly ma fai atu se isi tatalo le leoa. Sa ia faafetai atu i le Tama Faalelagi mo le fesoasoani ia te ia ia lototele e pei o Anisha.
Ata na tusia e Zhen Liu