O le Eseta i le salafa o le Lalolagi

Taumafai e faataitai nei tu ma aga o le Eseta mai le salafa o le lalolagi.

o Maua(Kites) o le Eseta

I Bermuda, e faafeleleai ai maua e tagata ae lei oo i le Eseta e faamanatu ai le toetu mai o Iesu Keriso mai le tuugamau. E mafai ona e faia se maua pepa ma tautau i luga e faamanatu atu ai ia te oe Iesu.

1. Oti se fasipepa i se foliga taimane.

2. Tusi ni laina se lua i le taimane e faafesootai ai itu uma e fa. E mafai foi ona e faapipiiina ni fasilaau i luga o laina.

3. I totonu o vaega taitasi e fa, tusi ai mafuaaga e te alofa ai ia Iesu Keriso. E mafai foi ona e valivali le maua.

4. Faaopoopo le manoa i le pito i lalo, ma faapipii i luga o aufana pepa pe a e manao ai. Ona tautau lea i luga o lau maua.

o Fala o le Eseta

I totonu o El Salvador ma Kuatemala, e faamanatu ai e tagata le Eseta e ala i le faia o alfombras (fala) i luga o auala. Latou te faaaogaina le ili, fugalaau, ma isi mea e fai ai ni mamanu felanulanuai e foliga o ni fala. O fala o se meaalofa ia Iesu.

E mafai ona e faia sa oe lava fala o le Eseta! Vali se mamanu i luga o pepa po o le faaaoga o laau ma le penisina e fai ai se fala i fafo.

Valivaliina o Fuamoa

I Ausetalia, Aferika i Saute, Iukureini, ma le tele o isi atunuu, e valivali e tagata fuamoa e faamanatu ai le Eseta. O fuamoa e mafai ona avea o se faatusa o le toetu ma le ola fou.

Faatasi ai ma se fesoasoani mai se tagata matua, ia faapuna ni nai fuamoa. A maalili loa fuamoa, teuteu i latou i maka, vali, valigao, po o vali.

Falaoa o le Eseta Faa-Italia

I Italia, e fai ai e tagata pane di Pasqua (falaoa o le Eseta). O le siepi o le pale e faamanatu atu ai ia i latou le pale tuitui na tuu e fitafita i luga o le ulu o Iesu. Faaaoga le fua lenei e fai ai au lava falaoa.

1. Sa’eu faatasi le 2 1/4 tisipuni o le fefete, 1 1/4 ipu susu mafanafana, 1 sina ini o le masima, 1/3 ipu pata ua faavaivai, 2 fuamoa, ma le ipu suka e 1/2. Ona faaopoopo lea o ipu falaoamata e 3 1/2. Palu lelei. (Afai ua piipii tele le paluga, faaopoopo i ai sina falaoamata.)

2. Vaevae le paluga e fai ai ni polo laiti e 12. Olo polo taitasi i ni maea e 14-inisi (35-cm) pei ni maea.

3. Milo faatasi ni maea se lua, ona faapipii lea o pito e fai ai se li‘o. Fai ni pale se ono.

4. Tuu pale i luga o se apa tao ma ufiufi i se ie. Tuu laia mo se itula.

5. Ki muamua le ogaumu i le 350°F (170°C). Sa’eu se fuamoa ise sipuni ma pulumu i luga o pale. Faaopoopo i ai ni teuga suamalie.

6. Tuu fuamoa ua vali (mata) i le ogatotonu o pale, pe a e manao ai. Tao mo le 20 minute pe seia oo i le enaena auro.

O le a se isi mea e mafai ona e faaaogaina e fai ai se pale? Pepa? Laulaau?

Auina mai ia i matou se ata o le mea na e faia! Alu i le faavaa pito i tua e vaai pe faapefea.

Ata na tusia e Mark Robison