Tusia e You

Alu e Nofo i Ona autafa

Sierra F., 12 tausaga, Utah, ISA

I se tasi aso i le aoga, sa ou faalogo ai ua sauaina se tamaitiiti. Sa ou lagona le faanoanoa. E leai se tasi e tatau ona taulimaina faapena.

Mulimuli ane i lena aso, sa faia ai se pati a le matou vasega. O le tamaitiiti sa sauaina analeila na sau i le pati ma nofo na o ia. Ina ua ou vaai ia te ia, sa ou manatua le mea na tupu. Sa ou faalogoina se leo o fai mai ia te a’u e nofo i ona autafa. Ae ou te le’i manao e na o a’u lava e nofo i ona autafa. O le a lelei o ia, Sa ou mafaufau ai. Na te le manaomia se tasi e nofo i ona autafa. Sa ou tuleia ese le lagona.

Sa toe oo mai le siufofoga ia te a’u, ma le malosi tele. Alu e nofo i ona autafa.

Sa ou toe tilotilo atu i le tamaitiiti. Sa foliga tuuatoatasi o ia ma faanoanoa. Ua lelei, Sa ou mafaufau ai. Ina ua ou nofo ifo i ona autafa, sa foliga le to’a o ia. Sa ou ta‘u atu ia te ia lo’u igoa ma fesili atu ia te ia e uiga ia te ia lava. I le taimi muamua, sa ou popolevale. A o ma talanoa, sa ou lagona le toafilemu. Ma sa le’i toe foliga tuuatoatasi pe faanoanoa foi o ia.

Ina ua ia toe foi i le vasega, sa ou fai atu o le a ou talanoa ia te ia i se taimi mulimuli ane. Sa ataata teisi o ia ma fai mai Seki. Sa sau lo‘u faiaoga ia te a’u ma fai mai, “Faafetai lava, Sierra. E ese lou agalelei.” Sa na ona lue atu o lo‘u ulu.

O le vaega na totoe o le aso na vave lava ona oo mai, ae e lei aluese lena lagona toafilemu. Na ou iloa na ou faia le mea sa’o. O nisi taimi e le taulimaina lelei tagata ona e ese i latou. Ou te le fiafia i ai, ae e tupu.

O i tatou uma o fanau a le Atua. E tatau ona tatou taulimaina ma le agalelei isi. Afai tatou te faia lenei mea, ou te iloa o le a faamanuiaina i tatou e le Atua.

Ata na tusia e Kristin Sorra