Usa ka Mensahe sa Komperensiya gikan sa Propeta
Pagkaplag og Kalinaw diha sa Inyong Kasingkasing
Ni Presidente Russell M. Nelson
Gikuha gikan sa “Pagsangyaw sa Ebanghelyo sa Kalinaw” ug sa “Ang Gahom sa Kadasig sa Espirituhanong Paglambo,” Liahona, Mayo 2022.
Gimahal ko kamo ug nag-ampo alang kaninyo matag adlaw. Adunay daghang mga kalisdanan sa kalibotan. Ang mga kasungian ug ang pandemya nakaapekto sa daghang mga tawo. Ang kalibotan nanginahanglan og tabang.
Si Jesukristo mao ang Prinsipe sa Kalinaw. Ang Iyang ebanghelyo mao lamang ang mahangtorong paagi sa pagkaplag og kalinaw. Karon labaw pa kaysa kaniadto, nagkinahanglan kita sa kalinaw nga Siya lamang ang makahatag.
Ang mga sumusunod ni Jesukristo angay nga mopakita sa ehemplo ngadto sa tibuok kalibotan aron sundon. Unsaon nato sa pagdahom nga moabot ang kalinaw sa kalibotan kon dili kita magtinguha og kalinaw diha sa atong kaugalingong kinabuhi? Walay makakontrolar sa mga buhat sa uban. Apan kita makakontrolar sa atong mga kaugalingon.
Palihog buhata ang tanan ninyong mahimo sa pagtapos sa mga kagubot sa inyong kinabuhi. Pagmapainubsanon, maisogon, ug magmalig-on. Kana makatabang kaninyo nga mapasaylo ang uban ug magtinguha og kapasayloan kon nakabuhat kamo og sayop. Pangayo og gahom gikan ni Jesukristo ug sa Iyang Pag-ula aron sa pagtabang kaninyo.
Si Jesus mao ang Kristo! Siya buhi! Siya nahigugma kaninyo ug motabang kaninyo.
Tiwasa ang Istorya
Unsay inyong buhaton kon ang kasungian mahitabo tali sa usa ka igsoong lalaki, igsoong babaye, o higala? Pagpili og usa sa mga hulagway sa ubos. Dayon pagdrowing og hulagway o pagsulat kon unsaon ninyo pagkaplag og kalinaw.