Pagpabiling Luwas ni Rufus
Gikaon ni Estelle ang iyang kataposang bahin sa lamian nga mga enchilada ni Mama ug gipasagirit ang iyang lingkoranan palayo gikan sa lamesa sa pasilyo. Usa kadto ka mainiton nga gabii sa ting-init—nindot kaayo nga mokaon sa gawas. Ug nindot kaayo alang sa pagdula! Mahinamon na kaayo siyang makigdula og fetch sa iyang iro, nga si Rufus.
Apan una kinahanglan niyang limpyohan ang lamesa. Gipatong-patong niya og taas ang mga plato. Nasayod siya nga ang pundok nag-uyog-uyog na. Apan dili siya ganahan nga magsige og balik-balik.
Gibalanse ni Estelle ang pundok sa usa ka kamot ug mainampingon nga giablihan ang pultahan sa laing kamot. Apan ang pundok misugod sa pagtakilid. Lagapak! Duha ka plato ang nabuak diha sa pasilyo, sa atubangan gayod sa pultahan. Midagan si Papa sa gawas aron tan-awon kon unsay nahitabo ug miadto aron mokuha og silhig. Dayon nakita ni Estelle si Rufus. Paspas siyang nagpaingon sa pultahan.
“Rufus! Ayaw og tunob sa nabuak nga mga plato!” Midagan siya palibot sa lamesa ug miambak sa iyang atubangan. “Ayaw! Rufus, pagpuyo!”
Apan wala mohunong si Rufus. Naningkamot siya nga mahiduol kaniya. Midungo si Estelle ug gibutang ang iyang mga kamot sa iyang atubangan.
“Rufus, naningkamot ko nga ipabilin kang luwas,” miingon siya. “Hait ang mga bildo. Makasamad kini sa imong mga tiil.”
Dayon si Estelle adunay ideya. “Asa ang imong bola? Gusto ka ba nga magdula og fetch?” Mihawa si Rufus aron mangita sa iyang bola. Karon luwas na siya!
Samtang iyang gihipos ang nangabuak nga mga plato uban ni Papa, naghunahuna si Estelle kon nganong giingnan niya si Rufus og dili. Kon iyang natumban ang mga bildo, nasakitan unta siya. Dili unta siya makabuhat sa unsay iyang ganahan buhaton—sama sa pagdula og fetch.
Kanunayng miingon si Papa nga ang Langitnong Amahan naghatag og mga sugo aron magpabilin kitang malipayon ug luwas. Apan usahay si Estelle naghunahuna nga ang mga sugo mas mabati nga daw mga lagda aron sa pagpugong kaniya sa pagbuhat sa unsay iyang gusto.
Gitan-aw ni Estelle sa ubos ang buak nga mga bildo. Tingali modili kanako ang Langitnong Amahan sa pipila ka butang tungod kay naningkamot siya nga ipabilin akong luwas usab, naghunahuna siya.
Midagan si Rufus padulong kang Estelle ug gihulog ang bola sa iyang tiilan. Gikalot niya ang iyang mga dalunggan. Dayon gilabay niya ang bola ug mikatawa samtang gigukod kini ni Rufus.
Luwas si Rufus. Ug malipayon siya! Gusto si Estelle nga magpadayon sa pagsunod sa mga sugo sa Langitnong Amahan aron magpabiling malipayon ug luwas usab.
Mga paghulagway pinaagi ni Kelly Smith