Ang Desisyon sa Dula nga Footy
Gusto si Sam nga modula og footy, apan gusto usab niya nga mobalaan sa adlawng Igpapahulay.
Nagtan-aw si Sam sa pula nga bola nga misulbong sa ibabaw paingon kaniya. Gisalo niya kini sama lang sa iyang pagbansay uban ni Papa. Kini ang iyang unang adlaw sa pagbansay sa footy ug ang iyang unang tuig sa pagdula sa usa ka tinuod nga team.
Sa kataposan sa pagbansay, nanamilit si Sam sa iyang mga kauban sa team.
“Kita ta sa sunod semana!” miingon ang usa kanila.
Misakay si Sam sa sakyanan ni Mama aron mopauli.
“Bag-o lang nakong nahibaloan nga ang mga dula sa imong footy nga team matumong og Dominggo,” miingon si Mama. “Unsa kaha ang angay natong buhaton?”
Hilom si Sam. Kon mosimba siya sa Dominggo, nan dili siya makadula og footy uban sa iyang team. Apan kon moadto siya sa iyang mga dula, tingali dili siya makasimba. Gusto niya nga buhaton ang duha! “Makaadto ba ta sa mga dula sa dili pa ang pagsimba?” nangutana siya.
“Kinahanglan kita og usa ka oras aron modrayb paingon sa simbahan. Dugang pa, kinahanglan kita og oras nga mangandam sa dili pa kita moadto,” miingon si Mama.
Nasayod si Sam nga husto si Mama. Aduna siyay gamay nga igsoong babaye ug masuso nga igsoong lalaki. Kanunayng nagkinahanglan og taas nga oras nga maandam ang tanan alang sa pagsimba.
“Apan ang labing importanteng butang mao nga gusto kita mobuhat og mga butang sa Dominggo nga magpahinumdom kanato kang Jesukristo ug sa Langitnong Amahan,” miingon si Mama. Human sa usa ka minuto siya midugang, “Tingali makaadto ka sa imong pagbansay sa footy matag Huwebes ug moadto sa simbahan matag Dominggo.”
Mitambo si Sam sa bentana. Ganahan siya nga mosimba ug magkat-on mahitungod ni Jesus matag Dominggo. Nasayod siya nga usa ka paagi nga mahimong sama ni Jesukristo mao ang pagbalaan sa adlaw nga Igpapahulay. Apan masulub-on siya nga dili makatambong sa iyang mga dula sa footy.
Wala masayod si Sam kon unsa ang buhaton. Dayon aduna siyay ideya.
“Mag-ampo kita kabahin niini,” miingon si Sam. “Mag-ampo ko samtang magpadayon ka sa pagdrayb.” Gikyugpos niya ang iyang mga bukton ug gipiyong iyang mga mata. Ingon og kiwaw gamay nga mag-ampo sulod sa sakyanan. Apan nasayod siya nga makaampo siya bisan asa. Sa iyang pag-ampo, gipasabot niya ngadto sa Langitnong Amahan kon unsay nahitabo.
“Palihog tabangi ko nga makahimo sa husto nga pagpili,” miingon siya. Sa dihang nahuman na siya, miingon siya og amen. Miingon usab og amen si Mama.
Si Sam adunay mainiton nga pagbati sa iyang kasingkasing. Nasayod siya unsay buhaton.
“Unsay imong hunahuna?” Nangutana si Mama.
“Gusto ko nga moadto sa pagbansay matag Huwebes ug mosimba matag Dominggo.” Mipahiyom si Sam. “Nasayod ko nga importante nga himoong espesyal ang Dominggo.”
“Murag nindot kaayo kana nga plano,” miingon si Mama.
Niana nga semana, miadto sa pagbansay sa footy si Sam pagka-Huwebes. Pagka-Dominggo, misimba siya. Nakakat-on siya og dugang mahitungod kang Jesus. Malipayon si Sam nga nakaadto siya sa simbahan ug sa footy, bisan og dili siya makaapil sa mga dula. Nindot ang pagbati nga ibalaan ang adlawng Igpapahulay.
Mga paghulagway pinaagi ni Ruth Bennett