Pagpuli-puli alang sa Simbahan
“Sa imong pagpauli, sultihi ko unsa nga mga awit ang imong gikanta sa Primary,” miingon si Jenny.
“Buhaton nako kana!” miingon ang iyang igsoon nga babaye nga si Miriam samtang gisul-ob niya ang iyang mga sapatos.
Dili tanan sa pamilya ni Jenny ang makasimba kada Dominggo. Adunay unom ka tawo sa pamilya ni Jenny. Apan si Mama adunay igong kwarta lamang nga mopalit og duha ka tiket sa bus sa matag semana. Mao nga kinahanglang magpuli-puli sila sa pagsakay sa bus paingon sa simbahan.
Nangandoy si Jenny nga makaadto siya kada semana. Ganahan siya nga magkat-on mahitungod ni Jesukristo. Ganahan siya nga mokanta diha sa Primary. Gusto siya nga makakita sa iyang mga higala. Labaw sa tanan, gusto siya nga mobati sa mainiton, malipayon nga pagbati nga kanunay niyang mabati sa simbahan. Apan karon kinahanglan niyang magpabilin sa panimalay.
“Adto na ta.” Migakos nga nanamilit si Mama kang Jenny ug sa iyang igsoon nga lalaki ug mga igsoong babaye.
Naningkamot sa pagpahiyom si Jenny samtang mibiya si Miriam ug si Mama. Apan mibati siya nga kahilakon samtang mitan-aw siya kanila nga mipalayo. Unta turno na nako nga moadto, naghunahuna si Jenny. Kanunayng lisod nga magpabilin sa panimalay.
“Gusto kang magkolor?” Ang manghod nga lalaki ni Jenny, si Marco, mipakita og pipila ka krayola ug papel.
Mitando si Jenny.
Sulod sa misunod nga pipila ka oras, nagbasa si Jenny og mga istorya ug nagkolor uban ni Marco ug sa ilang mas magulang nga mga babaye. Lingaw kadto, apan nagsige og hunahuna si Jenny mahitungod sa simbahan. Nagkat-on ba sila karon og bag-o nga mga awit sa Primary? Unsa man kaha ang leksiyon karon?
Sa kataposan nadungog ni Jenny nga miabli ang pultahan sa atubangan. Nauli na si Mama ug Miriam!
“Mama! Miriam!” Nagdali-dali nga miadto si Jenny ngadto sa pultahan ug gigakos sila.
Gibutang ni Mama ang iyang pitaka. “Hisgotan nato kon unsay among nakat-onan sa simbahan.”
Ang tanan magkauban nga nanglingkod. Gipagawas ni Mama ang gamay nga hymnbook nga iyang gisulod sa iyang pitaka. Ang pamilya ni Jenny mikanta sa “Mga Pamilya Mahimong Manag-uban sa Hangtod.” Nahibalo siya sa tanang pulong.
Dayon nangutana si Jenny kang Miriam mahitungod sa Primary. Giablihan ni Miriam ang iyang Basahon ni Mormon ug gibira ang usa ka pinilo nga piraso sa papel. Gipataas niya kini aron makita sa tanan. Kadto usa ka gikoloran niya nga hulagway ni Jesus uban sa pipila ka bata.
“Gikoloran namo ang usa ka hulagway ug mikanta sa ‘Maninguha Kong Mahimong Mahisama Kang Jesus.’ Dayon naghisgot kami mahitungod kon sa unsang paagi si Jesus makatabang sa tanan.”
“Naghisgot usab kami niana sa Relief Society,” miingon si Mama. “Si Jesukristo makatabang kanato kon kita nahadlok o nag-inusara.” Gipagawas ni Mama ang usa ka piraso sa papel gikan sa iyang pitaka. “Ang magtutudlo mihatag sa tanan niini nga kinutlo gikan sa propeta. ‘Kon kamo mopili sa pagpuyo sa habig sa Ginoo, wala gayod kamo mag-inusara.’”*
“Bisan dinhi sa panimalay!” Miingon si Jenny.
Mipahiyom si Mama. “Bisan sa panimalay. Kanunay kitang makabati nga duol ang Manluluwas kanato.”
Mipahiyom og dako si Jenny. Dili siya makasimba kada semana. Apan makabati siya nga duol kang Jesus sa panimalay. Ug mahinamon siya sa iyang turno nga mosimba pag-usab sa dili madugay.
Mga paghulagway pinaagi ni Laura Catrinella