Mga Team ug Mga Talento

Ni Alelie Coronel-Camitan

(Gibase sa usa ka tinuod nga istorya)

Ang labing maayo nga team magtinabangay ug motabang sa usag usa nga mahimong mas maayo.

“Dagan, Jillian, dagan!” Misinggit si Papa. Ang papa ni Jillian mao ang coach sa iyang team sa football. Nagpraktis sila og maayo aron maandam alang sa kampyonato nga dula. Ang adlaw init, apan si Jillian nagpadayon sa pagdagan.

Sa kataposan gipatingog ni Papa ang pito. “OK, mopahulay usa ta.”

Gikuha ni Jillian ang iyang imnanan sa tubig ug milingkod sa lingkoranan tupad sa mga batang lalaki. Siya lang ang babaye sa team, apan bale wala ra niya kini. Nagtinabangay sila ug mitabang sa usag usa nga mahimong mas maayo. Bisan og gikapoy na ug nagkadusingot, mibati siya og kalipay sa pagdula uban sa iyang team.

“Pa, kumusta man ang among gihimo karon?” nangutana siya.

Mipahiyom si Papa. “Nindot kaayo! Sa akong paminaw ang team andam na alang sa dula.”

Mibalos og pahiyom si Jillian. Ang tanan nilang paghago nagbunga gayod

Sa iyang pagpauli gikan sa praktis si Jillian nakakita sa iyang higala nga si Mei. Kauban sila sa klase sa Primary. Apan si Mei taud-taud nang wala moadto sa Primary.

Mipahiyom si Jillian ngadto ni Mei. “Hi, Mei! “Gimingaw na ko nimo sa Primary. OK ra ka?”

Mitan-aw si Mei sa iyang sapatos. “Ang akong mama dili gusto nga moadto ko sa simbahan.”

“Ngano man?”

“Wala ko kahibalo.” Mihangad si Mei. “Kuan, moadto na ko.”

Miwara-wara sa kamot si Jillian ug mitan-aw ni Mei nga mipalayo. Unsaon nako sa pagtabang si Mei? naghunahuna siya.

Sa dihang nauli na si Jillian, mipatukar siya og mga awit sa Primary sa iyang ukulele. Dayon gidapit niya ang iyang mga igsoong lalaki sa pagdungan og kanta. Nanganta sila hangtod gitawag sila ni Mama alang sa panihapon.

“Mobisita ko ugma ni Sister Aurea,” miingon si Mama.

“Si Sister Aurea mao ang mama ni Mei, dili ba?” Pangutana ni Jillian. “Mahimo ba ko nga mouban nimo? Si Mei wala na moadto sa Primary. Ug sa dihang nakit-an nako siya karon, mora man siya og magul-anon.”

“Sige, makauban ka,” miingon si Mama.

“Akong dad-on ang ukulele! Akong tugtugon ang mga kanta sa Primary. Sigurado ko nga gimingaw na siya sa pagkanta niini,” miingon si Jillian.

Sa dihang miabot sila sa balay ni Mei pagkasunod adlaw, si Jillian hugot nga migakos ni Mei. Samtang ang ilang mga mama nag-istorya, ang mga batang babaye migawas. Gitugtog ni Jillian ang iyang ukulele, ug si Mei mipili og mga kanta. Nalingaw sila nga nagkinataw-anay ug nagdungan sa pagpanganta hangtod nga oras na para molakaw na si Jillian.

“Nindot kaayo nga nagkita ta,” miingon si Jillian. “Gimingaw mi nimo sa Primary.”

“Oo, maayo unta kon makaadto ko. Tingali, akong hangyoon pag-usab ang akong mama.”

Pagkasunod Dominggo, si Mei misimba. Mitupad si Jillian niya. “Malipayon kaayo ko nga nakaabot ka,” miingon siya.

Mipahiyom si Mei. “Ako usab.”

Pipila ka adlaw ang milabay panahon na alang sa dakong dula sa football. Mihangyo si Jillian sa team sa paglitok og pag-ampo sa wala pa ang dula. Dayon oras na para magdula. Midagan si Jillian og kusog kutob sa iyang mahimo. Naningkamot siya uban sa iyang ka-team aron makuha ang bola ug makascore sa mga goal. Ang iyang team midaog sa dula!

Nianang gabhiona sa iyang paghigda, naghunahuna si Jillian mahitungod ni Mei ug sa iyang team sa football. Malipayon siya nga nahimong kabahin sa team, sama nga siya malipayon nga nahimong kabahin sa Primary. Silang tanan nagtinabangay sa usag usa. Nalipay si Jillian nga nakatabang siya sa iyang mga higala, masimbahan man o diha sa natad sa dula.