Ang Pasulit sa Trabaho
Nasayop lang siguro ni!
“Unsang matang sa trabaho ang inyong gustong maangkon kon modako namo?” Si Gng. Lu nangutana sa klase.
Sayon ra kanang tubagon! Gusto kong mahimong usa ka siyentista. Akong gihanduraw ang akong kaugalingon nga nagsul-ob og usa ka kupo sa lab ug naghimo og maanindot nga ekspiremento.
“Karon ang matag usa kaninyo mokuha og pasulit diha sa computer nga magsulti kaninyo kon unsa ang mga trabaho nga tingali malingaw kamong mobuhat ugma damlag,” miingon si Mrs. Lu.
Sa wala madugay diha nako sa computer, nagkuha og pasulit. Akong gitubagan ang tanang pangutana ug miginhawa og lawom samtang akong gituplok ang “finish” nga buton.
Siyentista! Artist! Astronaut! Naghunahuna ko samtang nagload ang mga result. Kadtong mga trabaho maanindot gayod.
Apan ang mga resulta wala naghisgot og bisan usa niadtong mga trabahoa. Gitan-aw nako ang lista. Ang Graphic designer ingon og maayong paminawon. Dili ko sigurado kabahin sa baker. O tigplano og kalihokan.
Ang labing makapahingangha ang usa nga milabaw sa resulta. Nagsulti kini kanako nga … florista.
Unsa to?! Usa ka tawo nga tighapnig og mga bulak? Naghunahuna ko. Nasayop lang siguro ni!
Apan nasayod ako nga matinuoron nakong natubagan ang matag pangutana. Ang akong nawong namula. Dili ko gusto nga makakita ang akong mga higala sa akong mga resulta, busa nagdali ko ug gipalong ang computer.
“Maayo!” matod sa akong suod nga higala, nga si Dan. “Ang resulta sa akoa usa ka website designer!”
“Nindot kana,” misulti kog hinay. “Apan sa imong hunahuna kini nga test takdo kaha mahitungod sa unsay atong mahimong trabaho?”
“Nan, usa lang kini ka pasulit,” miingon si Dan, mikibo sa iyang abaga. “Unsa ang labing taas nga trabaho?”
Mikaging ko sa kahadlok. “Basin nasayop kini. Apan nagsulti kini nako nga ako kinahanglan mahimong usa ka florista.”
Ang akong gikahadlokan og maayo natinuod. Misugod sa pagkatawa si Dan.
“Kahibawo na ko nga gusto nimo ang mga buwak alang sa trabaho! Ganahan ka kanunay sa mga werdo nga mga butang sama niana,” pasiaw ni Dan.
“Dili na mahitabo!” Mikusmod ko. “Dili man gani ko ganahan og mga bulak.”
Mipahiyom si Dan ug mabalik og atubang sa iyang computer. Misugod og sakit ang akong tiyan. Naulaw kaayo ko! Husto ba kaha ang pasulit? Husto ba si Dan?
Naglakaw padulong sa balay gikan sa eskwelahan, mibati gihapon ko og kaulaw mahitungod sa mga resulta sa akong pasulit. Naghunahuna ko mahitungod sa tanang butang nga ganahan nakong buhaton, sama sa paghimo og art ug magpatogtog sa piano. Lahi kini sa mga butang nga ganahan sa ubang mga batang lalaki diha sa akong klase.
Tingali ako werdo, hunahuna nako. Nanglugmaw ang mga luha sa akong mga mata samtang misulod ko.
“Unsay problema, Jeff?” Nangutana si Papa. “Aduna bay nahitabo sa eskwelahan?”
Milingkod ko ug misulti kaniya sa tanan kabahin sa pasulit sa trabaho ug unsa ka lahi ang akong gibati gikan sa kadaghanan sa ubang mga batang lalaki.
“Kahibalo ka, Jeff,” miingon siya, “Ang Langitnong Amahan ang mihatag kanimo sa imong mga talento. Gihigugma ka Niya ug gusto nga imoha kining palamboon. Ug ako nahigugma usab Kanimo! Ang makagusto sa lahi nga mga butang kay sa imong mga higala wala nakapahimo nimo nga werdo.”
“Mao ba?” Nangutana ko.
Mitando si papa. “Kitang tanan angay nga magkalahi. Gusto ko nga imong higugmaon kon kinsa ka. Ug hinumdumi, ang pasulit mao lang ang paghatag kanimo og pipila ka ideya sa unsay imong ganahan nga buhaton. Wala kini nagpasabot nga mao na gayod kana ang mahimo nimong trabaho. Kinahanglan ka nga mohimo sa imong kaugalingong mga pagpili. Apan kon ugma damlag ikaw moppili nga magflorista, sigurado ko nga maayo kaayo ka niini!”
“Salamat, Papa.” Gigakos nako siya. Wala na naglain ang akong tiyan.
Sa pagkasunod adlaw sa eskwelahan, si Dan milingkod tupad nako sa tingpaniudto. “Hey, Jeff,” miingon siya. “Pasayloa ko nga mikatawa ko nimo. Naghunahuna ko nga maayo kaayo ka sa bisan unsa nga trabaho nga imong maangkon!”
“Salamat, Dan,” miingon ko. “Kinsay nasayod—tingali makatag-iya ko og usa ka tindahan sa bulak ug ikaw ang maghimo sa website sa akong tindahan!”
“Sugot,” miingon si Dan, nagpahiyom. “Tingali ako sab ang imong unang kustomer!”
Paghulagway pinaagi ni Mark Robison