Dali, Sunod Kanako nga mga Kalihokan
Alang sa home evening, pagtuon sa kasulatan, o alang lamang sa kalingawan!
Pagtukod og usa ka Tabernakulo
Alang sa Exodo 35–40; Levitico 1; 16; 19
Istorya: Ang Ginoo mihangyo kang Moises ug sa iyang katawhan sa pagtukod og usa ka tabernakulo. Ang tabernakulo sama sa usa ka templo. Ang Ginoo misulti kanila sa pagtukod niini sama sa usa ka tolda aron madala nila kini samtang mibiyahe sila paingon sa gisaad nga yuta. Mabasa ninyo ang kabahin niini diha sa Exodo 39:33–43.
Awit: “Gusto Ko nga Makita ang Templo” (Songbook sa mga Bata, 99)
Kalihokan: Pagtukod og tolda sama sa tabernakulo. Mahimo kamong mogamit og mga habol, mga toalya, mga lingkoranan, ug bisan unsang butang diha sa inyong panimalay. Dayon lingkod sulod sa inyong tolda ug paghisgot kon nganong importante ang mga templo. O makahimo kamo og gamay nga tabernakulo gamit ang mga bloke o ubang mga butang.
Dula-dula sa Pagpasalamat
Alang sa Numeros 11–14; 20–24
Istorya: Usahay ang mga Israelita nakalimot kon sa unsang paagi ang Ginoo mitabang kanila. Gusto sa Dios nga makahinumdom kita nga magmapasalamaton. Kini makahimo usab nato nga mas malipayon!
Awit: “Gihigugma Ako sa Langitnong Amahan” (Songbook sa mga Bata, 16–17)
Kalihokan: Pagdula og dula-dula sa pagpasalamat! Markahi ang pipila ka tukog og usa sa tulo ka kolor. Dayon pagpuli-puli sa pagpili og tukog. Alang sa usa ka kolor, isulti ang ngalan sa usa ka tawo nga ikaw mapasalamaton. Alang sa laing kolor, isulti ang usa ka dapit nga ikaw mapasalamaton. Alang sa ikatulo nga kolor, isulti ang usa ka butang nga ikaw mapasalamaton.
Puzzle sa Pagpundok sa Israel
Alang sa Deuteronomio 6–8; 15; 18; 29–30; 34
Istorya: Ang Dios naghigugma sa tanan Niyang mga anak. Gusto siya nga magkapundok sila diha sa Iyang Simbahan. Apil sa buluhaton sa pagpundok sa Israel mao ang pagdala sa mga anak sa Dios balik ngadto Kaniya (tan-awa sa Deuteronomio 30:3).
Awit: “Israel, Israel Dios Nagtawag,” (Mga Himno, nu. 7)
Kalihokan: Guntinga ang mga piraso sa puzzle sa pahina 27. Dayon patagoi sa usa ka tawo ang mga piraso palibot sa lawak. Ipapangita sa tanan ang mga piraso. Kon mapundok na ang tanang piraso, pormaha og dungan ang puzzle. Nganong gusto man sa Dios nga ang tanan Niyang mga anak makabalik ngadto Kaniya?
Handomanan nga mga Bato
Alang sa Josue 1–8; 23–24
Istorya: Ang Dios mitabang kang Josue sa pag-iway sa Suba sa Jordan aron ang mga tawo makalakaw tabok sa uga nga yuta. Dayon ang Dios mihangyo kang Josue ug sa iyang katawhan sa pagkolekta og mga bato gikan sa suba aron sa paghinumdom kon giunsa sa Dios sa pagtabang kanila (tan-awa sa Josue 4:5–7).
Awit: “Kon Asa ang Gugma” (Songbook sa mga Bata, 76–77)
Kalihokan: Pangita og mga bato nga pintalan o koloran. Isulat ang pulong nga hinumdomi diha niini. Samtang inyo kining dayan-dayanan, paghisgot mahitungod sa mga paagi nga ang Dios mitabang kaninyo.
Mga paghulagway pinaagi ni Katy Dockrill