Mga Pioneer sa Matag Yuta
Si Tom ug ang Makalilisang nga Trangkaso
Nasayod si Tom nga ang Dios motabang kanila.
“Ania imna kini, Tamā (Papa),” Hinay nga misulti si Tom. Mihinay sa paglingkod ang amahan ni Tom gikan sa iyang banig. Gitabangan siya ni Tom nga mohigop og preskong tubig sa lubi.
Si Tamā [Papa] ug ang uban sa pamilya nangasakit sulod na sa pila ka adlaw. Hapit ang tanan sa balangay nangasakit usab. Usa ka pandemya ang midagsang sa isla—ang Spanish flu.
Miadto si Tom sa gawas. Siya lang usa sa mga tawo nga may igong kapiskay aron makaatiman sa uban. Ug daghang pamilya ang nagkinahanglan og tabang.
Nagkinahanglan ko og dugang nga tubig sa lubi, naghunahuna si Tom. Mikatkat siya sa taas nga punoan sa lubi. Sa dihang miabot siya sa kinatomyan, gipo-po niya ang pipila ka lubi ug gihagbong kini sa yuta.
Sa iyang pagkanaog, nakahunahuna si Tom sa mga tawo sa iyang balangay. Makahadlok tan-awon nga daghan kaayo nila ang nangasakit.
Sa miagi nga tuig, ang manghod ni Tom si Ailama, nasakit. Makalilisang usab kadto. Si Tom ug ang iyang pamilya nag-ampo alang kaniya nga mamaayo.
Dayon si Tamā adunay usa ka lahi nga damgo. Ang damgo mipakita kaniya kon unsaon sa pagtabang si Ailama nga mamaayo—pinaagi sa pagdokdok og panit gikan sa punoang kahoy nga wiliwili aron makakuha og duga. Mitabang si Tom ni Tamā sa pag-atiman ni Ailama, ug sila mihatag kaniya sa duga gikan sa kahoy. Ug si Ailama naayo gayod!
Nasayod si Tom nga ang Dios mitabang kanila. Ug nasayod siya nga ang Dios motabang kanila karon.
Gibuak ni Tom ang mga lubi. Ang tam-is nga kahumot sa tubig sa lubi nakahimo niya nga maarang-arang ang pamati. Miadto siya sa sunod nga panimalay sa balangay aron ipaambit ang uban nga tubig sa lubi ngadto sa iyang mga silingan. Miadto siya sa sunod nga panimalay. Ug sa sunod.
Milabay ang pipila ka semana. Matag adlaw si Tom nagkugi og maayo sa pag-atiman sa tanan. Nanakop siya og mga manok aron siya makahimo og init nga sabaw aron ipaambit. Nagsag-ob siya og binaldi nga tubig gikan sa tubod aron mainom sa mga tawo.
Pipila sa mga tawo sa balangay ni Tom namatay. Si Tamā namatay usab. Lisod kaayo kadto alang ni Tom. Ang tibuok balangay nagsubo. Apan bisan pa man niining tanan, nahinumdom si Tom nga ang Dios nahigugma kaniya ug motabang kaniya.
Wala mohunong si Tom sa pagtabang sa mga tawo. Ug taud-taud lang, ang mga tawo anam-anam nga nangaayo!
Sa kataposan ang pandemya nga trangkaso nahuman. Mihunong na ang pagkasakit sa mga tawo. Si Tom ug Ailama nakabalik na gani pag-usab sa pag-eskwela. Si Tom kanunayng mingawon ni Tamā. Apan nasayod siya nga ugma damlag makita niya ang iyang papa pag-usab. Ug nasayod siya nga ang Langitnong Amahan kanunayng anaa aron motabang kaniya.
Ang Samoa usa ka grupo sa mga isla sa Kadagatan sa Pasipiko.
Karon aduna nay usa ka templo sa Samoa.
Usa ka tradisyonal nga balay sa Samoa, gitawag og fale, walay mga bongbong.
Ang pandemya nga Spanish flu miabot sa Samoa niadtong 1918.
12 anyos si Tom sa dihang misugod ang pandemya.
Ang balangay ni Tom, Sauniatu, natukod pinaagi sa usa ka grupo sa mga Santos sa Ulahing mga Adlaw.
Mga paghulagway pinaagi ni Corey Egbert