Valivali ke ʻOsi Atu e ʻAho Taʻeolí
Naʻe fakafiefia ʻaupito hono vahevahe e ngaahi fakatātaá mo e ngaahi kaungāʻapí!
Ne lāunga ʻa Kelela. “ʻOku ʻikai ha meʻa ke fai!”
Naʻe lahi e ngaahi meʻa naʻá ne loto ke fakahokó. Ka naʻe ʻikai ke ne lava. Naʻá ne fie ʻalu ʻo kakau. Ka naʻe tāpuni ʻa e vai kaukaú. Naʻá ne fie vaʻinga ʻaki ʻene ʻū meʻavaʻingá. Ka naʻe ʻosi fakamaau ia ʻo faʻo. Naʻá ne fie vaʻinga mo hono ngaahi kaungāmeʻá. Ka naʻe toki hiki hono fāmilí. ʻOku nau nofo ʻeni ʻi ha fale nofo totongi naʻe ʻikai ke nau ʻiloʻi honau kaungāʻapí.
“Ko e hā ʻoku ʻikai ke ke valivali ai ha fakatātaá?” Ko e fehuʻi ange ia ʻa Mamí.
“ʻOku taʻeoli ia,” ko Kelala ange ia.
Ka naʻe puna hake hono kiʻi tuongaʻane ko Pení. Naʻá ne pehē, “Sai ia!” Naʻá ne lele ki he tēpilé ʻo maʻu ai ha ngaahi foʻi kala. Naʻá ne tā ha fuʻu ʻakau mo ha laʻā lanu engeenga.
Naʻá ne pehē, “ʻOku ou fie foaki ʻeni ki hotau kaungāʻapí.”
Naʻe fakafulofula ʻa Kelela. “Ka ʻoku ʻikai ke tau maheni mo hotau ngaahi kaungāʻapí.”
“Tau ō leva ʻo fakafeʻiloaki kiate kinautolu!” Ko Mami ange ia.
Naʻe hū atu ʻa Peni mo Mami ʻi he matapā ʻi muʻá. Naʻá na tukituki ʻi he matapā ne hanga mai mei he tafaʻaki ʻe tahá. Naʻe sio pē ʻa Kelela mei he matapaá.
Naʻe tali mai ʻe ha fefine. Naʻe ʻoange ʻe Peni ʻa e fakatātaá. Naʻe malimali ʻa e fefiné. Naʻá ne pehē ange, “Mālō ʻaupito.”
Naʻe sio atu ʻa Kelela ki he lue foki ʻa Peni ki he tēpilé mo e malimali fiefiá. Naʻá ne fakakaukau, Mahalo ʻoku ʻikai fuʻu kovi fēfē ʻa e valivalí.
Naʻe tangutu ʻa Kelela he tafaʻaki ʻo Pení. Naʻá na fakatou valivali ha fakatātā. Naʻe tā ʻe Kelela ha vaka lōketi mo ha ngaahi fetuʻu.
Naʻá na foaki ʻena fakatātaá ki ha toe kaungāʻapi ʻe ua. Naʻá na valivali leva ha meʻa lahi ange. Naʻá na tufa e ngaahi fakatātaá ʻi he toenga ʻo e hoʻataá. Naʻe mata mamahi ha kakai ʻe niʻihi ʻi heʻenau fakaava mai e matapaá. Ka ʻi heʻenau sio ki he fakatātaá, naʻa nau malimali. Naʻe fetaulaki foki ʻa Kelela mo Peni mo ha longaʻi fānau tokosiʻi naʻa nau nofo ʻi he fale nofo totongí.
ʻI heʻene ʻosí, naʻe puke ʻe Kelela e nima ʻo Mamí. “Naʻe fuʻu fakalata ʻaupito ia.”
Naʻe malimali ʻa Mami. “Ko e taimi ʻoku tau fai ai ha meʻa lelei ki ha taha, ʻoku nau fiefia ai. ʻOku tau fiefia foki ai mo kitautolu. Pea mahulu hake aí, ʻoku fiefia ai ʻa e Tamai Hēvaní.”
Naʻe talaange ʻe Kelela, “Mahalo te tau lava ʻapongipongi ʻo kole ki he fānau kehé ke tau valivali.”
“Ko ha fakakaukau lelei ʻaupito ia.”
Naʻe malimali ʻa Kelela. Naʻe fakalata ʻa e valivalí mo e vahevahe ʻo e ngaahi fakatātaá. Naʻe hoko hono ʻaho taʻeolí ko ha ʻaho fakafiefia!