Ko e Kau Paionia ʻi he Fonua Kotoa Pē
Ko e Fuofua Lea ʻa Moalá
Naʻá ne ʻiloʻi te ne lava ʻo fai ia ʻi he tokoni ʻa e Tamai Hēvaní.
Naʻe ngūngū leʻo siʻi pē ʻa Moala ʻi heʻena hū atu mo Mami ki tuʻa mei he falelotú. Ko e toki ʻosi ia ʻa e lotú.
Naʻe fakalea mai ʻa Palesiteni Sikoti, “Mālō e lelei, Moala.” Ko Lisiate G. Sikoti naʻe palesiteni fakamisiona ʻi ʻĀsenitiná, ʻa ia naʻe nofo ai ʻa Moalá. “Te ke loto-fiemālie nai ke fai ha lea ʻi he konifelenisi fakavahefonuá ʻi he māhina katuʻú?”
Naʻe ʻohovale ʻa Moala. Naʻá ne taʻu 12 pē, pea kuo teʻeki ai ke ne fai ha lea kimuʻa! Naʻá ne tali ange, “Te u lava pē ʻo feinga.”
Naʻe malimali ʻa Palesiteni Sikoti. “Mālō ʻaupito! Te ke sai ʻaupito koe.”
ʻI heʻenau foki ki ʻapi mei he lotú, naʻe tā vave e mafu ʻo Moalá. Naʻá ne tala ange, “ʻOku ʻikai ke u ʻilo pe te u lava ʻo fakahoko ia.”
Naʻe talaange ʻe Mami, “ʻE tokoniʻi koe ʻe he Tamai Hēvaní.” “Kuó Ne tokoniʻi koe ke ke fakahoko ha ngaahi meʻa faingataʻa kimuʻa, ʻikai ko ia?”
Naʻe kamo pē ʻa Moala. Naʻe ʻosi tokoniʻi ia ʻe he Tamai Hēvani kimuʻa atu. Hangē ko e taimi naʻá ne kau ai mo Mami ki he Siasí ʻi he taʻu ʻe taha kuohilí.
Naʻe fiefia ʻa Moala ke talaange ki hono kaungāmeʻa lelei taha ko Tālitá fekauʻaki mo hono papitaiso iá. Ka ʻi he taimi naʻe ʻilo ai ʻe he ongomātuʻa ʻa Tālitá, naʻe ʻikai ke na toe tuku ke vaʻinga ʻa Tālita mo Moala. Naʻe ongoʻi tuenoa ʻaupito ʻa Moala.
Ka naʻe tokoniʻi ia ʻe he Tamai Hēvaní ke ne maʻu ha ngaahi kaungāmeʻa foʻou. ʻI hono fuofua Sāpate ʻi he lotú, naʻá ne fakatokangaʻi ha taʻahine ʻoku tuʻu he veʻe matapaá.
Naʻe fakafeʻiloaki ange e taʻahiné, “Mālō e lelei. Ko Kamani au. Te ke fie tangutu fakataha mo au?” Ne ʻikai fuoloa kuo hoko ʻa Kamani mo Moala ko ha ongo kaungāmeʻa lelei.
Kuo pau ke loto-toʻa ʻa Moala ke lea ʻi he konifelenisi fakavahefonuá. Ka naʻá ne ʻiloʻi te ne lava ʻo fakahoko ia ʻi he tokoni ʻa e Tamai Hēvaní. ʻI he ngaahi uike siʻi hono hokó, naʻe ngāue mālohi ʻa Moala ki heʻene leá. Naʻá ne hiki e meʻa te ne lea ʻakí. Naʻá ne akoako leva ke lau leʻolahi ia.
Fāifai pea hokosia e ʻaho ke fakahoko ai ʻene leá. Naʻe tangutu ʻa Moala ʻi muʻa ʻo sio atu ki he kakai kotoa ʻi he falelotú. Naʻe fuʻu tokolahi ʻaupito!
Naʻe fakatokangaʻi atu leva ʻe Moala ha taha ʻoku taʻataʻalo ange ki ai. Ko Kamani ia! Naʻe taʻataʻalo atu ʻa Moala. Naʻá ne kiʻi ongoʻi fiemālie ʻi heʻene sio ki hono kaungāmeʻá ʻi he haʻofangá.
ʻI he hokosia hono taimí, naʻe tuʻu hake ʻa Moala ki he maiká. Naʻá ne mānava lōloa. Naʻá ne fakahoko leva ʻene leá. Naʻe kiʻi tetetete hono leʻó he kamatá. Ka naʻá ne ongoʻi hono tokoniʻi ia ʻe he Laumālie Māʻoniʻoní. ʻI he fakaʻosí, naʻá ne vahevahe ʻene fakamoʻoní. “ʻOku ou ʻilo ʻoku moʻui ʻa Sīsū pea ʻokú Ne ʻofa ʻiate kitautolu. ʻI he huafa ʻo Sīsū Kalaisí, ʻēmeni.”
ʻI he ʻosi ʻa e fakatahá, naʻe ō ʻa e taha kotoa ki tuʻa ʻo kai hoʻatā. Naʻe maʻu ʻe Kamani ʻa Moala peá ne fāʻofua kiate ia. Naʻá ne tala ange, “Naʻá ke fuʻu tōtōatu ʻaupito!”
“Mālō! Naʻá ku ilifia, ka naʻe tokoniʻi moʻoni au ʻe he Tamai Hēvaní.” Naʻe malimali ʻa Moala. Naʻá ne fai ha meʻa naʻe teʻeki ai ke ne fai kimuʻa, pea naʻá ne hoko ai ko ha paionia.
Ko ʻĀsenitina ʻa e fonua fika ua lahi taha ʻi ʻAmelika Sauté.
ʻE vavé ni pē ha ʻi ai ha temipale ʻe nima ʻi ʻĀsenitina.
ʻOku laka hake he paʻake fakafonua ʻe 30 ʻi ʻĀsenitina.
Naʻe kau ʻa ʻEletā D. Toti Kulisitofāsoni he taha ʻo e ongo faifekau naʻá na akoʻi ʻa Moala mo hono fāmilí.
ʻI he taʻu 12 ʻa Moalá, naʻá ne hoko ko e sekelitali ʻo e Palaimelí ʻi hono koló.
ʻI he ʻaho ní, ʻoku ngāue ʻa Moala ʻi he Siasí ʻi ʻIutā, USA.
Ngaahi tā fakatātā ʻa Christopher Thornock