Ko e Lova Tānaki Fefié
Naʻe pehē ʻe he palōfitá ʻoku ʻikai teitei totonu ke tuku ʻetau teuteú.
Naʻe taupatū e ongo vaʻe ʻo Luké he kelekelé. Naʻá ne sio ki mui. Naʻe vave ʻa e tulituli mai ʻa hono tehina ko Lōpetí!
“Mate! Ko koe ʻeni!” Ko Lōpeti ange ia.
Naʻe makiʻikiʻi ʻa Luke. Naʻá ne tulimui ʻi hono tuofefine lahi ko Milí.
Hili ʻenau vaʻingá, naʻa nau tangutu kotoa ʻo mālōlō.
“Ko e hā ha vaʻinga te tau fai he taimi ní?” Ko e fehuʻi ange ia ʻa Milí.
Naʻe fiefia ʻa Luke naʻe ʻi ai hono tokoua mo hono tuofefine ke nau vaʻinga. Ka kuo liliu ʻe he COVID-19 ha ngaahi meʻa lahi. Naʻe ʻikai ke nau lava ʻo ʻalu ki ha ngaahi feituʻu naʻe tokolahi ai e kakaí. Pea ʻi he taimi ʻe niʻihi naʻe ʻikai ngofua ke nau hū ki tuʻa.
Naʻe feinga ʻa Luke ke fakakaukau ki ha foʻi vaʻinga te nau lava ʻo vaʻinga ai. Naʻá ne fakakaukau leva ki ha meʻa naʻá ne fanongo ai ʻi he Palaimelí.
Naʻe pehē ʻe Luke, “ʻOku totonu ke tau fai ha meʻa ke tau mateuteu ai.”
“Ko e hā ho ʻuhingá?” Ko e fehuʻi ange ia ʻa Milí.
Naʻe sio ʻa Luke ki he ʻulu kuava takatakai ʻi honau falé. “Naʻe pehē ʻe he palōfitá ʻoku ʻikai totonu ke teitei tuku ʻetau teuteú. Mahalo te tau lava ʻo tānaki ha fefie he ʻahó ni. Te tau lava ʻo feʻauhi pe ko hai ʻe lahi taha e meʻa te ne maʻú!”
Naʻe lova ʻa Luke mo hono tokouá mo e tuofefiné ki he ʻulu ʻakau ofi ki honau falé. Naʻe tānaki ʻe Luke ha ngaahi vaʻafefie ʻi hono ongo nimá pea lele ke fokotuʻutuʻu ʻene fefié ʻi he feleokó. ʻI he aʻu atu hono tokouá mo e tuofefiné, naʻá ne tokoni foki kiate kinaua ʻi hono fokotuʻutuʻu ʻena fefié. Naʻa nau feleleʻi holo kae ʻoua kuo nau tānaki ha fuʻu fokotuʻunga lahi.
“ʻOku feʻunga ʻeni ki he tafu haka ʻi ha uike kakato ʻe taha!” Ko Mili ange ia.
Naʻe pehē ange ʻe Lōpeti, “Naʻe fakalata ia. ʻOku ou saiʻia he mateuteú!”
“Mo au pē,” ko Luke ange ia. Naʻá ne fie fakahoko ha meʻa kehe ke mateuteu ai.
Ko hono hokó, naʻá ne tō mo hono tokouá mo e tuofefiné ha bele (ko ha vesitapolo lanu mata) ʻi heʻenau ngoué. Naʻe tuʻusi ʻe Luke ha ngaahi vaʻa mei he ʻulu pele motuʻá ke tō ke lahi ange.
Lolotonga ʻenau ngāué, naʻe hū mai ki tuʻa ʻenau ongo kuí mo ʻenau ongomātuʻá.
“Ko koe pē naʻá ke tō e pelé?” Ko e fehuʻi ange ia ʻa Kulenipaá.
“ʻIo,” ko Luke ange ia. “Pea ne mau tānaki foki mo e fefie!”
Naʻe pehē ange ʻe Teti, “Mālō. Naʻá ku fuʻu femoʻuekina ʻaupito he ʻahó ni. Naʻe ʻikai ke u lava ʻo fakahoko ia.”
Naʻe tangutu ʻa Luke mo hono fāmilí ʻi fale he hoʻatā efiafi ko iá. Naʻa nau fanongo ki ha fanongonongo ʻi he letioó kuo pau ke nofo fale ʻa e tokotaha kotoa pē ʻi ha ʻaho ʻe fā ke taʻofi e mafola ʻa e COVID-19. Naʻe ʻikai ngofua ke mavahe ha taha mei hono ʻapí.
“Ko e meʻa lelei ʻetau tānaki e fefié he ʻaho ní. He ʻikai ke tau lava ʻo fai ia he taimí ni” ko Mili ange ia.
Naʻe malimali ʻa Luke. Naʻá ne fiefia ʻi heʻenau muimui ki he fakaafe ʻa e palōfitá ke mateuteú.