Ko e Lisi ʻa e Tuongaʻane Lahí
Naʻe kei vaʻinga pē ʻa Samanitā ko e kiʻi tuofefine ʻo ʻAniteluú, ʻaki ʻene ʻū meʻá.
Naʻá ne fehuʻi ange kia Mami, “Ko e hā ʻoku ʻikai ke ne lava ai ʻo tukunoaʻi ʻeku ʻū meʻá?”
“ʻOku kei siʻisiʻi ʻa Samanitā. ʻOkú ne kei ako pē,” ko Mami ange ia. “Ka ʻokú ne ʻofa ʻiate koe.”
Naʻá ne ʻiloʻi ia. Ka naʻe ʻikai ke ne fiemālie ai. Naʻá ne helaʻia he vahevahé.
Naʻe toʻo hake ʻe ʻAnitelū ʻene ʻū kalá. . Naʻá ne tā ha fakatātā ʻo e pusi ʻa ʻene kuifefiné. Naʻá ne ʻalu leva ke kumi ʻa Mami.
Naʻá ne fehuʻi ange, “ʻE lava ke u ʻave ʻeku taá kia Kulenimā?”
“Ko ha fakakaukau lelei ia.” ko e talaange ia ʻe Mamí.
ʻI he foki mai ʻa ʻAniteluú, naʻe valivali foki mo Samanitā ʻi he fakatātaá.
Naʻá ne kaila, “Kuó ke maumauʻi ia!”
Ne kamata ke tangi ʻa Samanitā. Naʻe ongoʻi loto-mamahi ʻa ʻAnitelū. Naʻe ʻikai ke ne ʻuhinga ke ʻai ke tangi.
Naʻá ne talaange kia Mami, “Kātaki. Ka ʻoku ou helaʻia he hoko ko ha tuongaʻane lahí.” Naʻá ne ongoʻi ʻokú ne fie tangi mo ia.
Naʻe fāʻofua ʻa Mami kia ʻAnitelū. “Fakamolemole ʻi heʻene tā valivali ʻi hoʻo fakatātaá. ʻE lava ke faingataʻa ʻa e hoko ko ha tuongaʻane lahí. Te u talanoa kia Samanitā ke ʻoua ʻe toe ala taʻepoaki atu ki hoʻo ʻū meʻá. Pea mahalo te tau lava foki ʻo hiki ha ngaahi meʻa ʻokú ke saiʻia ke fakahoko mo ia. Pea ʻi hoʻo loto-mamahi mo iá, te mo lava ʻo fai ha taha ʻo e ngaahi meʻa ʻi he lisí.”
Naʻe fakakaukau ʻa ʻAnitelū ki ai. Naʻá ne kamo leva.
Naʻe ngāue fakataha ʻa ʻAnitelū mo Mami ʻi he lisí.
ʻOku ou saiʻia he vaʻinga mo Samanitaá.
ʻOku ou saiʻia ke tuku ke ne fakaʻaongaʻi ʻeku meʻa vaʻinga he taimi ʻe niʻihi.
ʻOku ou saiʻia ʻi he fāʻofua mai ʻa Samanitā kiate aú.
ʻOku ou saiʻia he lautohi kiate iá.
Naʻe fakaʻosi ʻe ʻAnitelū ʻene lisí. Peá ne fāʻofua leva kia Samanitā. Naʻe lahi ha ngaahi meʻa lelei fekauʻaki mo e hoko ko ha tuongaʻane lahí!