Tohi ʻe Koe

Tulama ʻi Mui he Siteisí

Peisilī B., taʻu 12, ʻIutā, USA

ʻOku kei anga fakatamaiki hoku tuongaʻane siʻisiʻí, lahi ʻene ngaahi fakaʻānauá pea tokanga ki he niʻihi kehé. Ko e taha ia ʻo ʻeku kau poupou lahi tahá ʻi he taimi ʻoku ou faiva ai ʻi he siteisí. ʻOku ʻi ai foki ʻene ngaahi fiemaʻu makehe. ʻOku siʻisiʻi ʻaupito ki hono taʻu motuʻá pea faingataʻaʻia he laukongá, tohí, talanoá, mo e mahino kiate ia e niʻihi kehé. ʻOkú ne tuli foki.

ʻI ha ʻaho ʻe taha ʻi heʻeku ako tulamá, naʻá ku kaka he sitepú ke ʻalu ki he siteisí. Naʻá ku fanongo ki ha lea taʻeʻofa ha taha fekauʻaki mo e kau leka ʻoku faingataʻaʻia fakaesinó. Naʻe kamata ke fakakata mo kata e tokotaha kotoa ʻo kau ki ai.

ʻOku ou ʻilo naʻe ʻikai ke nau taumuʻa ke fakalotomamahiʻi au, ka naʻá ku loto-mamahi ʻaupito peá u lele ʻo kumi ha feituʻu ke toitoi ai. ʻI heʻeku tangutu ʻi hoku toitoiʻangá, naʻe tangutu mai ʻi hoku tafaʻakí ha taha matuʻotuʻa ange pea kamata talanoa mai fekauʻaki mo e foʻi tulamá. Naʻe kamata ke u ongoʻi fiemālie ange.

ʻI he taimi naʻá ku foki ai ki ʻapí, naʻá ku talaange ki heʻeku faʻeé ʻa e meʻa naʻe hokó. Naʻá ne talamai ʻoku sai pē ke u mavahe mei ha faʻahinga meʻa ʻokú ne ʻai ke u ongoʻi taʻe-fiemālie pea ʻoku sai pē ke talanoa ki ha taha matuʻotuʻa fekauʻaki mo ʻeku ngaahi ongó.

ʻI he taimi ʻe niʻihi ʻoku ʻikai mahino ki he kakaí ʻa e meʻa ʻoku fepaki mo ha taha ʻoku faingataʻaʻia pe ke ʻiloʻi ha taha ʻoku ʻi ai ʻene ngaahi fiemaʻu makehe. ʻOku ou fie hoko ko ha sīpinga ʻo e ʻofá mo e angaʻofá.

Tā Fakatātā ʻa Kristin Sorra