Ko e Fehuʻi ki he Vitioó
Naʻe fie maʻu ʻe Hōsea ha ngaahi tali, ka ko hai te ne lava ʻo fehuʻi ki aí?
Naʻe hū atu ʻa Hōsea ki he fale ʻinitanetí. Naʻe fokotuʻutuʻu e ʻū komipiuta ʻi he holisí, pea naʻe longoaʻa e lokí ʻi he tapa e ʻuhilá mo e patopatō mei he ngaahi keimi vitioó. Naʻe ʻikai ke ʻi ai haʻane komipiuta ʻi ʻapi, ko ia ko e feituʻu ʻeni naʻe haʻu ki ai ke ne fakaʻaongaʻi ha tahá. Naʻe ʻikai ke ne faʻa tatali ke sio ʻi ha ngaahi vitiō fakafiefia!
Naʻe muimui mai hono kaungāmeʻa ko Kālosí ʻi hono tuʻá. Naʻe ʻoange ʻe Hōsea ha paʻanga ki he tokotaha ʻoku ʻaʻana e falé. Naʻá ne maʻu leva mo Kālosi ha komipiuta ke fakaʻaongaʻi.
Naʻe ʻuluaki sio ʻa Hōsea ʻi ha foʻi vitiō fakaoli naʻe talaange ʻe hano kaungāmeʻa ʻi he akó. Naʻe fili leva ʻe Kālosi ha foʻi vitiō ke sio ai. Naʻá na taufetongi pē.
Naʻe talaange ʻe Hōsea, “Sio, ʻoku fekauʻaki ʻeni mo e Siasí.” Naʻá ne lomiʻi ʻi he foʻi vitioó pea kamata ke ne sio.
Naʻe lea ʻaki ʻe he tangata ʻi he vitioó ha ngaahi meʻa fakatupu puputuʻu fekauʻaki mo e Siasí. Naʻá ne pehē naʻe ʻikai ke moʻoni ʻa e Siasí. Naʻe ʻai ʻe he foʻi vitioó ke ongoʻi ʻe Hōsea hangē ʻoku kukuʻi hono lotó.
“ʻOkú ke pehē ʻoku moʻoni e meʻa naʻe lea ʻaki ʻe he tangata ko iá?” Ko e fehuʻi ange ia ʻe Hōsea ʻi he ʻosi ʻa e foʻi vitioó.
Naʻe kalokalo pē ʻa Kālosi. “ʻOkú ke pehē ʻoku moʻoni ʻene leá?”
Naʻe fakafulofula pē ʻa Hōsea. Naʻá ne lotua ke ʻiloʻi ʻoku moʻoni ʻa e Siasí pea naʻá ne ongoʻi lelei ki ai. Naʻá ne ongoʻi nonga maʻu pē ʻi he taimi naʻá ne ʻalu ai ki he lotú pe lau ʻene folofolá. Ka naʻe ʻikai ke ne ʻilo pe ko e hā te ne fakakaukau ki ai fekauʻaki mo e meʻa naʻá ne fanongo ai ʻi he vitioó.
ʻI he pō ko iá, naʻe vilo holo pē ʻa Hōsea ʻi hono mohengá. Naʻe ʻikai ke ne lava ʻo mohe! Naʻe lahi ha ngaahi fehuʻi naʻá ne fakakaukau ki ai. Ka ko hai te ne lava ʻo fehuʻi ki aí? Naʻe ʻikai ke kau ʻa Papá (Teti) ki he Siasí, pea naʻe fuʻu femoʻuekina ʻa Mamá (Mami) he ngāué. Naʻe ʻikai ha taha ke talanoa ki ai.
ʻI he ʻaho hono hokó ʻi he akó, naʻe malimali fōlahi ʻa Kālosi. “Naʻá ku fehuʻi ki heʻeku tangataʻeikí kau ki he meʻa ne talanoa ki ai ʻa e tangata ʻi he vitioó. Naʻá ne tali kotoa ʻeku ngaahi fehuʻí.”
Naʻe tuʻu hangatonu hake ʻa Hōsea. “Moʻoni? ʻOkú ke pehē te u lava ʻo talanoa mo hoʻo tangataʻeikí fekauʻaki mo ia?”
“ʻIo! Haʻu ki hoku ʻapí he tuku ʻa e akó, pea te ta lava ʻo talanoa ki heʻeku tangataʻeikí.”
Ne tuai e ʻosi ʻa e toenga ʻo e ʻaho akó. Naʻe ʻikai tangutu maʻu ʻa Hōsea ʻi hono seá. Naʻe faingataʻa ke tukutaha ʻene tokangá. ʻE lava ke maʻu ha ngaahi tali ki he ngaahi fehuʻi kotoa pē ʻi hono ʻatamaí!
ʻI he tuku ʻa e akó, naʻe tangutu hifo ʻa Brother Sāvala, ko e tangataʻeiki ia ʻa Kālosí, mo Hōsea mo Kālosi. Naʻa nau talanoa fuoloa fekauʻaki mo e vitioó. Naʻe maʻu ʻe Brother Sāvala ha tali ki he ngaahi fehuʻi kotoa ʻa Hōseá!
Naʻe talaange ʻe Hōsea, “Naʻá ku hohaʻa naʻa ʻikai te ke ʻiloʻi e tali ki heʻeku ngaahi fehuʻí.”
Naʻe pehē ʻe Brother Sāvala, “Neongo kapau naʻe ʻikai ke u maʻu ia, ʻoku ʻi ai maʻu pē ha ngaahi tali ʻa e Tamai Hēvaní.”
Naʻe talaange ʻe Hōsea, “Ka ʻi he taimi kotoa pē ʻoku ou lotu ai ke ʻilo ha meʻa, ʻoku ou maʻu pē ha ongo. ʻOku ʻikai ke u maʻu ʻe au ha tali.”
Naʻe pehē ʻe Brother Sāvala, “Ko e taimi ʻe niʻihi ko e talí ʻa ʻetau ongó.” “Te tau lava maʻu pē ʻo fekumi ʻi he folofolá mo lotua ke maʻu ha mahino. Mahalo he ʻikai maʻu e ngaahi talí he taimi pē ko iá, ka ʻoku sai pē ia. ʻOku ʻafioʻi ʻe he Tamai Hēvaní ʻa e meʻa kotoa pē ʻoku ʻikai ke tau ʻiló. Pea ʻe lava ke tokoniʻi kitautolu ʻe he Laumālie Māʻoniʻoní ke tau ongoʻi nonga.”
Naʻe fakakaukau ʻa Hōsea ʻi he toenga ʻo e ʻahó ki he meʻa naʻe lea ʻaki ʻe Brother Sāvalá. Naʻá ne tūʻulutui ʻo lotu ʻi he pō ko iá. Naʻá ne pehē, “Tamai Hēvani, ʻoku moʻoni nai ʻa e meʻa naʻe lea ʻaki ʻe Brother Sāvalá? ʻOku ʻikai ke u loto ke u ongoʻi puputuʻu.”
Naʻe ongoʻi nonga mo fiefia ʻa Hōsea. Naʻá ne houngaʻia ʻi heʻene lava ʻo hoko atu ʻene fakahoko ha ngaahi fehuʻí. Pea naʻá ne fiefia ʻi hono ʻoange ʻe he Tamai Hēvaní ʻa e tali naʻá ne fie maʻú.