Kaumeʻa ki he Kaumeʻa
ʻIkai ha Feituʻu Hangē ko ʻApí
Fai ʻe Amy A. Wright
Tokoni Ua ʻi he Kau Palesitenisī Lahi ʻo e Palaimelí
Mei ha ‘initaviu mo Sitinī Uoka.
Ko ʻeku kuifefine hono uá ko Mele Uilisoni Monikomelī. Naʻe fāʻeleʻi ia ʻi Sikotilani. Naʻá ne folau mo hono husepāniti ko Lōpetí ki Kānata ko e kumi ha ngaahi faingamālie foʻou.
ʻI he faʻahitaʻu failau ʻo e 1845, naʻá na fetaulaki ai mo e ongo faifekaú. ʻI he faʻahitaʻu momoko ko iá, naʻe mateuteu ʻa Mele mo Lōpeti ke kau ki he Siasí. Naʻe pau ke nau fahiʻi ha foʻi ava ʻi he ʻaisí kae fai e papitaisó!
Naʻe hiki ʻa Mele mo Lōpeti ki Nāvū, ʻIlinoi, USA, ke kau fakataha mo e kau mēmipa kehe ʻo e Siasí. Ka naʻe ʻikai fuoloa kuo fakamālohiʻi ke nau mavahe mei honau ngaahi ʻapí. Naʻa nau ō ki ʻIutā ʻi ha saliote fakafale. Naʻa nau nofo ʻi ʻOkiteni Noate ʻi ha veʻe moʻunga. Naʻe fakamanatu ai kia ʻIlisapeti ha moʻunga ʻi Sikotilani ko Peni Lomonitī (Moʻunga Maama). Naʻá ne kole ki he kau taki ʻo e koló ke fakahingoa ʻa e moʻunga ko ʻení ko Peni Lomonitī. Naʻa nau loto ki ai.
ʻI heʻeku kei tupu haké, naʻe nofo ʻeku ongo kuí ʻi he veʻe moʻunga ʻo Peni Lomonitií ʻi ʻIutā. Naʻa mau faʻa ō ki hona ʻapí ke fakafiefiaʻi e ngaahi ʻaho mālōloó mo e ngaahi meʻa makehe naʻe hokó. ʻI he faʻahitaʻu momokó, ʻoku hangē ʻa e sinou ʻi he moʻungá ha kiʻi matá. Naʻe talamai ʻe heʻeku kuifefiné naʻe fakamanatu ange ʻe he moʻungá ke ne loto-tui, loto-toʻa, mo faivelenga hangē ko Melé. Naʻá ne pehē naʻe hangē ia ha ʻāngelo ʻokú ne tokangaʻi kimautolú. Naʻá ne talamai, “Kapau te ke lava ʻo sio kia Peni Lomonitī, ʻokú ke ʻi ʻapi.”
ʻOku ou tui ʻoku hangē ʻa e ngaahi temipalé ko Peni Lomonitií. ʻOku nau fakamanatu mai ke tau loto-tui, loto-toʻa, mo faivelenga. ʻI he taimi ʻoku tau vakai ai ki he temipalé, ʻoku tau manatuʻi ai hotau ʻapi fakalangí. ʻOku ʻikai pē mo ha toe feituʻu ʻe hangē ko ʻapí!
Tā fakatātā ʻa Augusto Zambonato