Ang Paborito nga Kanta ni Fatima
Miiktin-iktin si Fatima samtang diha sa kalsada. Naglakaw siya padulong sa balay gikan sa eskwelahan uban ni Mamá. Milaylay siya og usa ka kanta samtang siya miiktin-iktin.
“Si Ms. Lopez mihangyo kanamo nga magkat-on og usa ka kanta,” miingon si Fatima. “Makatudlo ka ba nako og usa?”
Mipahiyom si Mamá. “Siyempre!”
Sa dihang miabot na sila sa panimalay, si Mamá ug si Fatima nagdungan sa pagpanganta. Daghan ang ilang gikanta. Apan wala nila kantaha ang iyang paborito.
“Mahimo ba ko nga mokanta og kanta sa Primary?” Nangutana si Fatima.
“Mahimo kaayo,” miingon si Mamá.
Si Fatima mikanta og “Mga Pamilya Mahimong Manag-uban sa Hangtod.” Siya mipraktis sa mga pulong uban ni Mamá. Dayon gikanta niya kini nga nag-inusara. Mikanta siya niini hangtod nga nahusto na niya ang tanan nga mga pulong.
Sa eskwelahan, si Fatima mahinamon nga mopaambit sa iyang kanta ngadto sa iyang klase.
“Aduna bay gustong mopaambit sa ilang kanta?” Miingon si Ms. Lopez.
Giisa ni Fatima ang iyang kamot. “Ako!”
Siya mitindog ug mipahiyom. “Ako adunay pamilya. Gipangga ko nila,” siya mikanta.
Samtang siya mikanta, gibati ni Fatima ang kalipay. Ug siya nahinumdom sa tibuok kanta! Ang tanan sa iyang klase mipakpak.
Human sa klase, si Mamá miabot sa pagkuha ni Fatima. Si Ms. Lopez nakig-istorya ngadto ni Mamá.
“Mikanta siya og maanindot nga kanta. Ug ingon og wala gayod siya mahadlok.”
Mipahiyom si Fatima. Mao usab si Mamá.
“Manganta man kami og maanindot nga mga kanta matag dominggo sa simbahan!” Miingon si Fatima.
“Mahimo kang mokuyog namo bisan kanus-a,” miingon si Mamá.
Mipahiyom si Ms. Lopez. “Salamat.”
Si Fatima mikanta samtang siya milakaw pauli uban ni Mamá. Ganahan siya nga mopaambit og usa ka kanta ngadto sa iyang klase. Ang pagkanta makapalipay kaniya.
Mga paghulagway pinaagi ni Alessia Girasole