Gikan sa Unang Kapangulohan
Ang Kahayag ug ang Kalinaw sa Templo
Ni Presidente Henry B. Eyring
Ikaduhang Magtatambag sa Unang Kapangulohan
Gikuha gikan sa “Gusto Ko nga Makita ang Templo,” Liahona, Mayo 2021, 28–31.
Ang pagkakita sa usa ka templo o sa usa ka litrato sa usa ka templo makahatag kaninyo og tinguha nga mosulod ugma damlag. Moabot ang adlaw nga makakuha na kamo og rekomend sa templo aron sa pagbuhat og mga pagbunyag diha sa templo. Kon bunyagan kamo alang sa usa ka tawo nga namatay, gitabangan ninyo ang Manluluwas sa Iyang sagrado nga buhat sa pagpanalangin sa usa ka anak sa atong Langitnong Amahan.
Pipila ka tuig ang milabay, miadto ako sa templo uban sa akong anak nga babaye. Siya ang kataposan nga bunyagan nianang adlawa. Mihangyo ang usa ka worker sa templo sa akong anak nga babaye kon mahimo pa siyang magpabilin og taas-taas nga panahon aron mabunyagan alang sa tanan nga mga ngalan kinsa andam na nianang adlawa. Miingon siya og oo.
Nagtan-aw ko sa akong anak nga babaye nga miubog ngadto sa bunyaganan. Nagsugod ang mga pagbunyag. Midagayday ang tubig sa iyang nawong sa matag higayon nga siya mitunga gikan sa tubig. Balik-balik siyang gipangutana, “Makahimo ka pa og dugang?” Sa matag higayon, mitubag siya og oo uban sa determinado nga tingog. Nagpabilin siya hangtod nga ang kataposang tawo diha sa lista nabunyagan sa ngalan ni Jesukristo.
Ako pang mahinumdoman ang pagbati sa kahayag ug kalinaw samtang nagdungan kami og lakaw gikan sa templo. Mao kini ang paagi nga ang pagserbisyo sa templo makabayaw ug makausab kanato.
Kahayag sa Templo
Ibutang kini nga mga hulagway diha sa inyong panimalay aron sa pagpahinumdom kaninyo nga makasulod kamo sa templo ugma damlag.
Mga paghulagway pinaagi ni David Habben