Bag-ong Eskwelahan, Bag-ong Higala
Unsaon kaha ni Ada makahigala kon dili siya makasulti og Chinese?
“Nahadlok ko,” miingon si Ada. Mao kadto ang iyang unang adlaw sa eskwelahan didto sa Taiwan. Apan dili siya makasulti og Chinese sama sa uban nga mga estudyante. Unsaon kaha niya sa pakighigala? Kinsa ang mahimo niya nga kadula atol sa break time?
Gigakos ni Mama og hugot si Ada. “Ok ra nga mahadlok.”
Nagmug-ot si Ada. “Dili ko kahibalo unsaon sa pagpakighigala dinhi.”
Gigakos na usab siya ni Mama. “Kon makulbaan ka, tingali maghunahuna ka og kanta sa Primary. Makatabang ba kana?”
Mitando si Ada. Dayon milakaw siya uban ni Mama ngadto sa iyang klasehanan. Ang iyang magtutudlo nagpaabot kaniya. “Ni hao!” miingon ang magtutudlo. Naningkamot sa pagpahiyom si Ada. Wala siya kahibalo unsa ang ipasabot niadtong mga pulonga.
Nanamilit si Ada ngadto ni Mama. Dayon nakakita siya og usa ka desk ug milingkod.
Mitan-aw siya sa uban nga mga bata. Pipila kanila nag-istoryahanay sa usag usa. Ang uban hilom ra nga nanglingkod sama ni Ada. Nakulbaan si Ada. Kini nga pagbati daw sama nga adunay mga buyog nga naglupad-lupad sa iyang tiyan.
Dayon nakita ni Ada ang usa ka batang babaye nga naghilak. Gusto si Ada nga motabang kaniya. Apan unsaon niya sa pagtabang kon siya dili makasulti og Chinese? Unsa kaha kon ang batang babaye dili gusto og tabang?
Apan gibuhat dayon ni Ada ang unsa unsay gisulti ni Mama. Naghunahuna siya sa mga pulong sa iyang paborito nga kanta sa Primary: “Maninguha Kong Mahimong Mahisama kang Jesus.” Nasayod si Ada nga ang Espiritu Santo naghangyo kaniya sa pagtabang.
Si Ada milingkod tupad sa batang babaye. Iyang gigakos siya. Dayon gitapik niya ang abaga sa batang babaye sama sa gibuhat sa Iyang mama kon magguol si Ada. Mihilom ang batang babaye sa paghilak! Mibalos siya sa paggakos ni Ada.
Gitudlo ni Ada ang iyang kaugalingon. “Ada”
Ang batang babaye mitudlo sa iyang kaugalingon. “Mei,” miingon siya.
Mipahiyom si Ada. Milingkod siya tupad ni Mei sa tibuok adlaw. Bisan og sila dili makasulti sa parehas nga pinulongan, sila nag-uban nga nalingaw. Dungan sila nga nangaon sa ilang paniudto. Nagdungan sila sa pagdula atol sa resis. Ug si Mei mitabang ni Ada nga makat-on og mga bag-ong mga pulong sa Chinese!
Dili makapaabot si Ada nga mosulti ni Mama mahitungod sa iyang bag-o nga higala. Nasayod siya nga kon siya nagsunod ni Jesus, siya dili kinahanglan mahadlok sa bisan unsang butang.
Mga paghulagway pinaagi ni Shawna J. C. Tenney