Ang Kinatam-isan nga Tumong
Dili na makahulat si David nga moadto sa Dubai Temple ugma damlag.
Mipuga og gamayng papilit si David ngadto sa usa ka cube nga asukar. Dayon mainampingon niya kining gipahimutang.
“Wow!” Miingon si Mama. “Nindot kaayo tan-awon ang imong templo nga hinimo sa cube nga asukar.”
“Salamat!” Miingon si David. “Kini ang Dubai Temple. Dili na ko makahulat nga mahuman ang tinuod nga templo.”
Si David mahinamon na sukad gipahibalo ni Presidente Nelson ang usa ka bag-o nga templo diha sa nasod diin nagpuyo si David. Ang United Arab Emirates adunay pipila sa kinatas-an nga mga gambalay [building] sa kalibotan. Apan kini wala pay templo. Kini mao ang unang templo sa tibuok Middle East.
Gipapilit ni David ang kataposang cube nga asukar ngadto sa iyang templo. “Kana!” miingon siya. “Nahuman na gayod.”
Miduko si Mama aron mas makakita og maayo. “Nindot pagkahimo! Asa nato kini ibutang?”
Naghunahuna si David. “Unsa kaha kon sa sulod sa akong kwarto? Tupad sa akong mga tren-tren.” Ganahan si David og mga tren. Gusto siya nga mahimong inhenyero sa tren ugma damlag.
“Nindot nga ideya,” miingon si Mama.
Mainampingon nga gidala ni David ang iyang templo nga hinimo sa cube nga asukar ngadto sa iyang kwarto. Hinay niya kining gibutang tupad sa iyang mga tren-tren. Dili na siya makahulat nga ipakita sa iyang mga igsoong babaye ug sa iyang papa.
Pagkasunod adlaw, ang tiya ni David nga si Ana mibista. Naghisgot sila mahitungod sa mga butang nga iyang [David] labing gipaabot. Dayon duna siyay nahunahunaan.
“Gusto ka mahibalo kon unsay akong labing gikahinaman?”Nangutana si David.
“Siyempre!” Miingon si Tiya Ana.
“Ang simbahan nga nag-adtoan ang akong pamilya nagtukod og templo sa Dubai!”
Mipahiyom si Tiya Ana. “Kana ingon og espesyal kaayo.”
“Espesyal gayod!” Miingon si David. “Karon, walay templo sa duol ang among simbahan, mao nga moadto kami sa templo sa Switzerland o Germany. Malipayon ko nga magkaanaa og templo nga mas duol kanamo. Nagtakda na ko og tumong nga mangandam nga moadto didto.”
“Makapahinam kaayo kana!” Miingon si Tiya Ana. “Unsa ang imong gibuhat aron mangandam?”
“Nag-ampo ako ug nagbasa sa mga kasulatan,” miingon si David. “Ug naningkamot ako sa pagsunod ni Jesukristo. Ug dayon maandam na ako sa pag-adto sa templo!”
“Nindot kana,” miingon si Tiya Ana. “Segurado ako nga maningkamot gayod ka nga makab-ot ang imong mga tumong.”
“Maningkamot gayod ko!” Malipayong mitando si David. Nindot sa paminaw nga makapaambit og butang nga importante kaayo kaniya.
Nianang gabhiona, nangutana si David kon mahimo niyang ibalhin ang iyang templo nga hinimo sa cube nga asukar ngadto sa kosina.
“Gusto nakong ibutang kini sa dapit diin kanunay nato kining makita. Gusto kong mahinumdom nga magpadayon sa pagpangandam alang sa templo.”
“Nindot kana nga ideya!” miingon si Papa. “Nagtuo ko nga makatabang usab kanako nga makakita sa imong templo kada adlaw.”
Gitabangan ni Papa si David nga ibalhin ang templo nga hinimo sa cube nga asukar ngadto sa kosina.
“Nindot tan-awon,” miingon ang igsoon nga babaye ni David nga si Kaitlynn.
“Kon mahuman na ang tinuod nga Dubai Temple, mahimo ba nakong dapiton ang akong mga higala nga motan-aw niini?” Nangutana si David.
Mitando si Mama. “Nindot kaayo kana nga ideya!”
“Ug si Tiya Ana?”
“Siyempre,” miingon si Papa.
Mipahiyom si David. Mapasalamaton na kaayo siya alang sa Dubai Temple!
Paghulagway pinaagi ni Mark Robison