Higala ngadto sa Higala
MOBAROG alang sa Unsay Inyong Gituohan
Ni Elder James R. Rasband
Sa Seventy
Gikan sa usa ka interbiyo uban ni Sydney Squires.
Niadtong nagdako ko, ang akong mama naghisgot kanako mahitungod sa ebanghelyo. Naghisgot siya mahitungod niini kada adlaw, dili lang ma-Dominggo. Ganahan siya sa mga istorya gikan sa Daang Tugon.
Ang akong paborito nga istorya mao ang mahitungod kang David ug Goliat. Si David usa lang ka batan-on nga magbalantay og karnero. Si Goliat dako kaayo, kusgan nga sundalo. Sa dihang miadto si David aron makig-away kang Goliat, wala magsul-ob si David og bisan unsang panalipod. Ang iyang bugtong nga hinagiban mao ang usa ka lambuyog aron sa paglabay og gagmay nga mga bato.
Apan mibarog si David alang sa unsay iyang gituohan. Wala siya nag-inusara. Ang gahom sa Dios nag-uban kaniya. Napildi niya si Goliat.
Ang akong mama ganahan mosulti kanako sa unsay giingon ni David ngadto kang Goliat: “Miduol ka kanako dala ang imong espada ug bangkaw apan ako makigsangka kanimo sa ngalan sa Ginoo nga Labing Gamhanan” (1 Samuel 17:45). Nasayod ako nga ang akong inahan misalig nga ang Dios mag-uban kanamo. Siya motabang kanamo bisan kon kami nag-atubang og mga hagit nga ingon kadako ni Goliat.
Kini usa ka importante nga leksiyon alang kanako. Sa dapit diin ako nagdako, kasagaran ako lang ang miyembro sa Simbahan sa eskwelahan, sa akong mga team sa paugnat og kusog, o uban sa mga higala. Tungod sa akong mga gituohan, lahi ang akong sinultihan ug linihokan kay sa daghan sa akong mga higala. Kini misangpot sa daghang panag-istoryahanay sa akong mga higala mahitungod sa Simbahan. Ang akong suod nga mga higala mitahod kanako. Sa ubang higayon ang mga tawo misungog kanako. Apan wala gayod ako naulaw sa akong mga gituohan. Mibati ako nga mapasigarbohon nga nagbarog alang sa usa ka butang.
Kon kita mosunod sa ebanghelyo, mahimo kitang lahi. Si Apostol Pedro miingon nga kita mahimong “katawhan nga iya sa Dios” (1 Pedro 2:9). Ug OK lang kana. Dili kita kinahanglan mabalaka mahitungod sa pagkahimong lahi kon kita mobarog alang sa unsay atong gituohan.
Paghulagway pinaagi ni Jared Beckstrand