Ang mga Pioneer sa Matag Yuta
Ang Dugay nga Pagpangita ni Michael
Si Michael naghunahuna kon hain nga simbahan ang tinuod.
Gikabiba ni Michael ang iyang backpack sa iyang abaga. Mao kadto ang unang adlaw sa eskwelahan, ug siya dili na makapaabot pa! Siya ug ang iyang pamilya nagpuyo sa India. Daghang mga bata sa iyang siyudad ang dili makaeskwela. Mapasalamaton si Michael nga siya adunay oportunidad sa pagkat-on.
Ganahan siya sa pagkat-on—ilabi na sa matimatika. Ganahan usab siya magbasa og mga magasin. Siya mipakli sa mabulokon [colorful] nga mga pahina. Iyang gibasa ang mahitungod sa lainlaing mga hayop sa tibuok kalibotan.
Usa ka adlaw si Michael nagbasa og lahi nga matang sa magasin. Kini gikan sa Ang Simbahan ni Jesukristo sa mga Santos sa Ulahing mga Adlaw. Ganahan si Michael magbasa niini. Gusto siya nga makakat-on og dugang pa.
Nakaadto na si Michael sa uban nga mga simbahan kaniadto. Ganahan siya nga magkat-on mahitungod ni Jesukristo. Apan usahay mibati siya nga nalibog. Kon hain nga simbahan ang tinuod?
Sa kadugayan, nakabasa siya og usa ka booklet mahitungod ni Joseph Smith. Duna siyay gibati nga lahi samtang nagbasa niini. Si Joseph Smith nakaadto usab sa lainlaing mga simbahan nangita alang sa kamatuoran. Tingali nahisama ko ni Joseph, naghunahuna si Michael.
Gusto ni Michael nga moadto niining bag-o nga simbahan aron makita unsa kini. Apan walay mga simbahan sa mga Santos sa Ulahing mga adlaw sa India. Nasagmuyo si Michael. Gipadayon niya ang pagkat-on kutob sa iyang mahimo. Gibasa niya ang Basahon ni Mormon ug nag-ampo. Siya nasayod nga kini tinuod! Gusto siya nga mabunyagan. Apan kinahanglan siya nga mohulat.
Mga katuigan ang milabay. Sa dihang si Michael nag 21, usa ka senior nga magtiayong misyonaryo miadto sa India. Sa kataposan, si Michael nabunyagan! Sa wala madugay nakaserbisyo siya og misyon sa iyang kaugalingon didto sa Utah, USA.
Daghan pang katuigan ang milabay. Usa ka adlaw ang usa ka higala mitawag kaniya. Ang Simbahan nangita og tawo aron makatabang sa paghubad sa kinatibuk-ang komperensiya alang sa mga tawo sa India. Si Michael nakulbaan sa sinugdanan. Apan nalipay siya nga makatabang.
Usa ka hapon sa Oktubre si Michael naghubad og usa ka pakigpulong ni Presidente Nelson diha sa kinatibuk-ang komperensiya. Nakadungog siya sa propeta nga mipahibalo nga usa ka templo matukod sa India! Gusto ni Michael nga mosinggit sa kalipay. Mihilak siya og mga luha sa kalipay.
Mapasalamaton si Michael alang sa tanan nga iyang nakat-onan sa eskwelahan. Apan labaw sa tanan, mapasalamaton siya nga nakat-on mahitungod sa ebanghelyo ni Jesukristo. Nalipay siya nga mas daghang tawo sa iyang nasod nga makakat-on usab mahitungod Kaniya!
Sa dili madugay aduna nay templo sa India!
Ang India adunay kapin sa 20 ka opisyal nga mga pinulongan.
Adunay duha ka misyon sa India karon.
Ang paborito nga pagkaon ni Michael mao ang biryani (kan-on ug mga karne nga giluto nga adunay mga lamas).
Ang iyang paborito nga istorya sa kasulatan kay kabahin ni Jose diha sa Daang Tugon.
Karon, si Michael motabang sa paghubad sa kinatibuk-ang komperensiya alang sa mga tawo sa India.
Mga paghulagway pinaagi ni Oriol Vidal