E ma’a tauturu iti hau a’e
E mea ’ārearea a’e te parau nō te mau ivi mo’o rarahi [dinosaure] i te ha’api’ira’a fa’atītī’aifaro parau.
« Alex, ’ua tae te taime nō te haere i te ha’api’ira’a fa’atītī’aifaro parau » ’ua parau Jenkins vahine.
Pi’o a’era Alex i tōna upo’o. Te ha’api’ira’a fa’atītī’aifaro parau ’o te hō’ē ïa piha ta’a ’ē i reira ’oia e haere ai. E mea fifi roa nāna ’ia fa’ahiti i te tahi mau ta’o ’e te tahi mau parau. Nō reira, e tītauhia iāna ’ia ha’api’ipi’i i te reira i roto i te piha fa’atītī’aifaro parau, ma’a taime i te hepetoma. I te mau taime ato’a e fa’aru’e ’oia i tāna piha ha’api’ira’a tāmau, e ha’amā noa ’oia !
Hi’o atu ra ’oia i tāna ’orometua. « E nehenehe au e ma’iri ? », ’ua muhumuhu ’oia. « Nō teie noa pa’i mahana ? »
I teie mahana, e haere mai ’o Timmons tāne i te piha ha’api’ira’a a Alex, nō te paraparau nō ni’a i te mau mo’o rarahi. E rave Timmons tāne i te ’ohipa i roto i te hō’ē fare manaha ’e e rave rahi ivi mo’o rarahi fa’ahiahia. E ’āfa’i ato’a mai ’oia i te hō’ē ivi e rave rahi tauatini matahiti ! ’Aita Alex i hina’aro e ma’iri i te reira.
’Ua hi’o Jenkins vahine iāna ma te mata ’ata’ata. « Tītauhia rā ’ia haere ’oe i te ha’api’ira’a fa’atītī’aifaro parau. E ho’i mai paha ’oe nō te tuha’a hope’a o te ha’api’ira’a a Timmons tāne ».
’Ua tāmata Alex i te ’ata’ata atu, ’aita rā i ti’a iāna. Haere marū noa atu ra ’oia i te ha’api’ira’a fa’atītī’aifaro parau. I roto i te piha, e reo rātou i te hō’ē ā parau, fa’ahou ’e fa’ahou ā. E mea ’ārearea a’e i te ha’api’i mai nō ni’a i te mau mo’o rarahi.
« Mea au ’ore roa nā’u e parau i teie mau parau ma’ama’a », ’ua parau ’oia i tōna ’orometua ha’api’ira’a fa’atītī’aifaro parau. « Mai te huru ra e pēpe ’aru’aru vau ».
« E ’ere roa atu ’oe i te pēpe ’aru’aru », ’ua parau te ’orometua. « E hina’aro tātou pā’āto’a i te tahi taime i te hō’ē ma’a tauturu hau a’e. ’Ua ’ite ānei ’oe ē, ’ua haere ato’a na vau i te ha’api’ira’a fa’atītī’aifaro parau i tō ’oe fāito matahiti ? »
’Ua ’ana’anatae ri’i mai ’o Alex i terā parau. ’Ua fa’aitoito ’oia i te toe’a o te piha, i te reo i tāna mau parau.
I te ho’ira’a Alex i roto i te piha a Jenkins vahine, ’ua ’ite atu ’oia i tōna hoa Courtney i te haerera’a i rāpae.
« Tē haere nei ’oe i hea ? », ui atu ra ’oia.
’Ua pi’o a’era Courtney i te upo’o. « Tē fifi nei au nō te tai’o. Tītauhia iā’u ’ia haere i te hō’ē piha ta’a ’ē nō te tai’ora’a ». ’Ua ha’amā ri’i Courtney.
« Hei, ’aita e pe’ape’a », ’ua parau Alex. « Nō ho’i noa mai nei au mai tā’u piha ha’api’ira’a fa’atītī’aifaro parau. ’Ua nā ni’a noa vau i te hō’ē ā parau ē hope noa atu. » Ha’ami’o a’era ’oia i tōna ihu.
« ’Aē ? »
Tā’iri’iri a’era tōna upo’o. « E piti matahiti i teienei tō’u haerera’a i te ha’api’ira’a fa’atītī’aifaro parau. »
« ’Aita vau i ’ite ri’i a’e ! » ’ua parau Courtney.
Pe’e a’era tō Alex pa’ufifi. « ’Aita vau i parau i te hō’ē ta’ata. ’Ua taiā vau ’o te fa’a’ō’o rātou iā’u. »
« E’ita roa atu vau e fa’a’ō’o ia ’oe », ’ua parau Courtney. « Tē ’oa’oa nei au, ’ua ho’i mai ’oe i te taime mau nō te hi’o i te ivi o te mo’o rarahi. Mea fa’ahiahia mau ! » Aroha atu ra Courtney ’ia Alex. « E haere au. ’Āraua’e. »
Ē ’ite a’era Alex ē, e ’ere ’o rāua Courtney ana’e tē haere nei i te tahi mau piha ta’a ’ē. ’Ua haere Tommy i te hō’ē piha nō te tauturu iāna ’ia ha’api’i i te ’aravihi tōtiare maita’i a’e. ’E ’ua ’ohipa Bekah ’e te hō’ē ’orometua ta’a ’ē nō te tauturu i tōna rima ’ia pūai atu ā i muri a’e i te pēpēra’a te reira iāna.
I teienei, ’aita Alex e feruri ’ino nei nō tāna piha fa’atītī’aifaro parau. ’Ua hina’aro ’oia e tauturu i te tahi atu mau tamari’i ’eiaha rātou ’ia taiā. ’Ua tauturu ’oia ia Courtney nō te tai’ora’a ’e ’ua paraparau ia Tommy i te taime tāmā’ara’a. Pauroa te ta’ata tei hina’aro ma’a tauturu hau atu, ’e ’aita e fifi !
Tē fāri’i nei au ma’a tauturu hau a’e nō te tai’o.
Tē fāri’i nei au ma’a tauturu hau a’e nō te ’aravihi tōtiare.
Tē fāri’i nei au ma’a tauturu hau a’e nō tō’u rima.
Fa’ahōho’ara’a nā Mark Robison