Te buka ta’a ’ē
« Nā ’oe i teiene e tai’o, e Pāpā », ’ua parau Bernice. ’Ua heheu ’oia i te mau pāpa’ira’a mo’a. ’Ua pārahi ’o Māmā ’e Pāpā i pīha’i iho iāna i ni’a i te pārahira’a.
’Ua tai’o Pāpā i te ’īrava mātāmua « ’Ua ’ite au ē ’ua aroha ’oia i tāna mau tamari’i. »
« ’Ua ’ite au ē ’ua aroha ’oia i tāna mau tamari’i », ’ua parau fa’ahou Bernice.
« ’Āre’a rā », ’ua parau Pāpā, « ’aita vau i ’ite i te aura’a nō te mau mea ato’a. »*
’Āre’a rā, e parau fifi ïa ’ia fa’ahiti. E’ita tā Bernice e nehenehe e tai’o, ’e ’aita ’oia i ta’a i te mau parau ato’a. E mea au rā nāna ’ia fa’ahiti i te mau parau ’ia tai’o ’āmui ana’e tōna ’utuāfare i te mau pāpa’ira’a mo’a.
I te mahana i muri iho, i te taime pāpa’ira’a mo’a, e tao’a tā Pāpā. ’Ua parau ’oia : « E tao’a ta’a ’ē tā’u nō ’oe ». ’Ua hōro’a ’oia ia Bernice i te hō’ē buka. E hōho’a nō te ta’ata ’e te hō’ē poti i mua.
« Nō’u ānei teie ? » ’Ua ui atu Bernice. ’Ua tāpe’a ’oia i teie buka rahi i ni’a i tōna ’ōuma.
« Nō ’oe terā », ’ua parau ’o Pāpā. « ’A hi’o na i roto ».
’Ua heheu Bernice i te buka. Eā, ’ua ’ara’ara maita’i tōna mata ’Ua rahi roa te mau hōho’a pēni ’ū rau.
« E aha teie ? » ’Ua ui atu Bernice.
’Ua fa’atoro Pāpā i ni’a i te mau parau o te tāpo’i buka. « Te mau ’ā’amu o te Buka a Moromona », ’ua nā ’ō ’oia.
’Ua fāfā Bernice i te mau parau i ni’a i te tāpo’i buka. « Te mau ’ā’amu o te Buka a Moromona », ’ua nā ’ō ’oia.
« Hō’ē ā mau ā’amu tā tātou e tai’o nei i roto i te mau pāpa’ira’a mo’a », te parau ïa a Māmā.
’Ua fa’atoro a’era Bernice i ni’a i te hō’ē o te mau hōho’a. « ’O vai terā ? », tāna ïa uira’a.
« Hmm. Tē ’ite ra ānei ’oe i te fana ’e te mau te’a ? » Te uira’a ïa a Māmā.
’Ua tā’iri’iri te upo’o o Bernice.
« Tē ha’amana’o ra ānei ’oe ’ua tai’o tātou nō ni’a i te hō’ē ta’ata ’ua fati tāna fana ? » Te uiraa ïa a papa.
« ’O Nephi ? » Te parau ïa a Bernice.
« ’Ē, ’o Nephi te reira », ’ua parau Pāpā.
’Ua ’ata’ata ’o Bernice. « Māuruuru e Pāpā. Māuruuru e Māmā. ’Ua au roa vau i teie buka. »
I te mau pō ato’a e tai’o Bernice i tāna buka pāpa’ira’a mo’a nā muri ia Māmā ’e ’o Pāpā. ’Ua fa’atoro ’oia i ni’a i te mau hōho’a. ’Ua ha’api’i ’oia i te fa’ahiti i te tahi mau parau e ’ere i te mea ’ōhie ’ia fa’ahiti. ’E ’ua ha’api’i ’oia i te tai’o ’ōna ana’e iho i te tahi mau ta’o ’ōhie !
’Ua tupu tōna mana’o ’oa’oa i te tai’ora’a i te mau pāpa’ira’a mo’a. ’Ua ’oa’oa ’oia ’ua nehenehe iāna ’ia tai’o i te reira nā muri ia Māmā ’e ’o Pāpā !
Fa’ahōho’ara’a nā Adam Record