Tano maita’i te roa
’Aita Trina e au ra i tōna vaira’a ta’a ’ē.
« E mea na’ina’i roa ’oe ! » ’Ua parau Sasha. « E pi’i mātou ia ’oe ’o Trina na’ina’i. »
E tāmata ’o Trina i te ’ata’ata. E fa’a’ō’o rahi te tahi atu mau tamari’i o te fare ha’api’ira’a iāna nō tōna na’ina’i. E mea na’ina’i ’oia i te fānaura’ahia ’e ’aita ’oia i roa vitiviti, mai te tahi atu mau tamari’i. ’Aita rā ’oia e au i te i’oa Trina na’ina’i. ’Aita ’oia e au ra i tōna vaira’a ta’a ’ē.
« Mea na’ina’i roa ’oe, e’ita paha ïa e tupu », ’ua parau Max ’a haere ai rātou i rāpae i te piha, nō te taime fa’afa’aeara’a.
« ’Ua ’ite au e mea na’ina’i au », ’ua parau Trina. « ’Aita tā’u e rāve’a. Mai, haere ana’e e ha’uti ».
Horo atu ra Trina e tu’e i te pōpō ’e te tahi atu mau tamari’i. ’Ua tu’e rātou i te pōpō, i mua ’e i muri. Tē ’ārearea ’āmui ra rātou pā’āto’a.
’Aita rā i maoro, ’ua rohirohi mau roa Trina. ’Ua fa’aātea marū atu ra iāna i te ha’utira’a, ’e pārahi atu ra i ni’a i te ’aihere.
’Aita i maoro roa, tae mai nei tōna hoa Josie. Nō roto ato’a Josie i tāna piha Paraimere i te fare purera’a.
« Mea maita’i ’oe ? » Ui atu ra Josie.
Nā ō atu ra Trina « ’ē ». « Hina’aro noa vau e fa’afa’aea ri’i. E rohirohi roa tō’u mau mahaha ’ia horo rahi ana’e au. E ’ere rāua i te mea pūai roa. »
Pārahi iho ra Josie i pīha’i iho ia Trina. ’Ua huti rāua i te mau ’aihere ’e ’ua hāmani i te mau tāpe’a rima na’ina’i ’e te mau heirima. ’Ua paraparau rāua nō te ha’api’ira’a, te mau hoa ’e te mau ’ohipa nō te fare ha’api’ira’a.
« ’Ua fa’aro’o vau i te mea tā Sasha i parau » ’ua nā ’ō atu ra Josie. « ’Aita vau e au roa ’ia pi’i ’ōna ia ’oe, Trina na’ina’i. »
’Ua tā’iri noa Trina i te upo’o.
« Tē mana’o nei rā vau e mea tano maita’i tō ’oe roa ! » ’Ua parau Josie.
’Ata’ata a’era Trina. Toro atu ra ’oia ia Josie i te heirima ’aihere tāna i hāmani.
I te sābati nō muri iho, tē fa’aineine ra Trina iāna nō te purera’a. ’Ua ’ō’omo i tōna ’ahu ’e ’ua pāhere i tōna rouru. I muri iho, ’ua fa’atu’atu’a ’oia i te mata ’a ’ite ai ’oia i tōna nā tia’a na’ina’i i roto i te ’āfata vaira’a. ’Ua pāpū iāna ē, ’aita e ta’ata ’ē atu i roto i tāna piha Paraimere e ’ō’omo i taua huru tia’a na’ina’i ra.
’Ua haere hāmarirau noa Trina nā roto i te ārea fare purera’a. ’A haere ai ’oia i tāna piha Paraimere, tē tīa’i ra Josie iāna i rāpae.
« E ’ohipa māere tā mātou nā ’oe ! » ’Ua parau Josie. « Haere mai ’a hi’o ! »
I te tomora’a Trina i roto i te piha, fa’atoro atu ra te tahi atu mau tamari’i ’e tō rātou ’orometua ha’api’i, te tuahine Bott, i te rima i ni’a i te tāpura ’ere’ere tei fa’anehenehehia i te ’ū purapura. ’Ua tāpiripirihia te mau māfatu nā te vāhi ato’a. I ni’a i te mau māfatu tē vai ra te mau parau : « E mata ’ata’ata rahi tō Trina ! E māfatu rahi tō Trina ! »
« Mea au nā ’oe ? », ui atu ra Josie. « ’Ua tauturu mai te tuahine Bott ia mātou nō te rave i te reira ».
« Mea au roa nā’u ! » parau atu ra Trina. « Māuruuru roa ».
« ’Ua hina’aro mātou e fa’aha’amana’o ia ’oe i te hō’ē parau mau rahi », ’ua parau te tuahine Bott. « ’Ua here te Metua i te ao ra ia tātou tāta’itahi. Te poto. Te roa. Te rahi. Te na’ina’i. E ’ere te reira i te mea faufa’a nāna. E mau tamari’i tātou pā’āto’a nāna ’e ’ua here ’oia ia rātou tāta’itahi. »
Hi’o atu ra Trina i te mau māfatu i ni’a i te tāpura ’ere’ere ’e ’ua ’ata’ata—e mata ’ata’ata rahi.
Fa’ahōho’ara’a nā Olga Lee