E ’āparaura’a ’e ’o Xiomara nō ni’a i te rirora’a ’ei ta’ata ’āpī i roto i te Feiā ’āpī tamāhine

Xiomara (e fa’ahitihia she-o-Ma-ra), nō Chiapas mai, e tuha’a fenua nō te pae apato’a nō Mēhiko. Nō tomo noa nei ’oia i roto i te Feiā ’āpī tamāhine.

Nā mua roa, tē hina’aro nei mātou e mātau maita’i ia ’oe.

E aha tā ’oe ’ohipa e au roa i te rave ?

E ta’ata’ahi i tō’u pere’o’o ta’ata’ahi, e tu’e i te pōpō ’e e tunu i te mā’a. Te mea tā’u e au roa i te tunu ’o te quesadillas ïa !

E aha tā ’oe ’ū au roa ?

Te re’are’a.

E aha te mea tā ’oe e hia’ai rahi nei, ’ia fa’anu’u ’oe mai te Paraimere i te Feiā ’āpī tamāhine ?

’Ua hina’aro rahi roa vau e haere i te hiero ’e ’ia rave i te mau bāpetizora’a.

E aha te mea i tupu i roto ia ’oe ’a haere ai ’oe i te Feiā ’āpī tamāhine nō te taime mātāmua roa ?

I te ha’amatara’a e mea fifi roa. ’Ua pe’ape’a vau nō ni’a i te mea tā te mau tamāhine pa’ari a’e iā’u e mana’o nō ni’a iā’u. ’Ua taiā ri’i au, ē tae roa i te taime ’a haere ’āmui ai mātou i te hiero. I reira tō mātou rirora’a mai ’ei hoa maita’i.

E aha te huru te haerera’a i te hiero nō te taime mātāmua roa ?

E mea ta’a ’ē mau. E ’ohipa pae vārua rahi te tomora’a i roto i te hiero o te Fatu. ’Ua hina’aro noa na vau e haere i te hiero. I te Paraimere, tē hīmene nei mātou, « Oh, j’aime voir le temple [Mea au nā’u e hi’o i te hiero. i te hō’ē mahana e haere au i reira] ». I teienei e nehenehe au e parau ē : « Mea au nā’u e haere i te hiero ».

I taua taime mātāmua ra i roto i te hiero, ’ua rave au i te mau bāpetizora’a nō te tahi o tō’u mau metua vahine fēti’i, te mau fēti’i o tō’u māmā rū’au (te māmā o tō’u māmā) ’e te tahi atu mau ta’ata ’o tā’u i ’ore i mātau. E tuha’a te hiero ’e te ’ā’amu ’utuāfare nō tō’u ’itera’a pāpū.

E aha te tahi mau ’ātivite ’ārearea tā ’oe i rave ’e tā ’oe pupu Feiā ’āpī tamāhine ?

Hāmani i te faraoa monamona ! ’Ua hāmani mātou e 150 faraoa monamona. I muri iho, ’ua ’ōpere atu mātou i te reira nā te tahi atu mau ta’ata. E mea ’ārearea mau te mau ’ātivite a te Feiā ’āpī tamāhine. ’Ua ’ī te reira i te mau ha’api’ira’a maita’i, te fa’aitoitora’a ’e te parau a’o nō te tauturu ia mātou ’ia riro ’ei misiōnare nō ananahi.

Tē vai ra ānei te tahi atu tamāhine nō tō ’oe fāito matahiti i roto i tā ’oe pāroita ?

’O vau ana’e. ’O vau ana’e ato’a te melo o te ’Ēkālesia i roto i tā’u piha i te fare ha’api’ira’a.

E mea fifi ānei ’ia riro ’ei melo ana’e nō te ’Ēkālesia i te fare ha’api’ira’a ?

’Aita. ’Ua ’ite tō’u mau hoa ato’a ē, tē pe’e nei au i te hō’ē ha’apa’ora’a fa’aro’o ta’a ē i tā rātou, ’aita rā rātou e fa’ariro nei iā’u e mea ta’a ’ē.

E aha tā ’oe e au roa nei i roto i te Feiā ’āpī tamāhine ?

E mea au nā’u ’ia ha’api’i rahi mai nō ni’a i te Fa’aora ’e te fa’anahora’a nō te fa’aorara’a. E ha’amaita’ira’a rahi te ravera’a i te ’ohipa ’ā’amu ’utuāfare. E mea au nā’u ’ia rave i te mau bāpetizora’a i te hiero, nō te hōro’a i te tīa’ira’a i tō tātou mau fēti’i tei fa’aru’e a’ena mai i teie fenua.

E mea au roa nā’u ’ia ti’a i roto i te ’āvirira’a a te Feiā ’āpī tamāhine !

Fa’ahōho’ara’a nā Alyssa Tallent