Cookies, mga Gakos, ug Gugma
“Ang Pasko lahi ra karong tuiga,” miingon si Eva.
Si Eva mikinto. Gikab-ot niya ang kahon diha sa aparador.
“Nakuha nako!” miingon siya.
Giablihan niya ang kahon. Sa sulod mao ang gamayng butang nga para sa Belen nga hinimo sa pula nga clay. Gipagawas niya kini ug gibutang og hinay ang batang si Jesus sa pasungan.
Dayon panahon na aron butangan og dekorasyon ang Christmas tree. Si Eva mitabang ni Mamá ug sa iyang manghod nga lalaki, si Nefi, nga isab-it ang mga suga ug manzanillas. Si Eva ganahan sa kahumot sa gagmayng dalag nga mga prutas. Sa pag-abot ni Papá sa balay, siya mitabang ni Eva ug Nefi sa pagbutang sa bitoon sa kinaibabwan sa Christmas tree.
Si Eva nalipay nga ang pipila sa ilang tradisyon sa Pasko mao ra gihapon karong tuiga. Ang uban morag lahi na kaayo.
Pipila ka semana ang milabay, usa ka bagyo ang miigo sa ilang siyudad sa Guatemala. Ang kusog nga ulan ug hangin miguba sa daghang balay. Pipila sa mga tawo nagpuyo pa gihapon sa mga dangpanan. Ug daghang tawo ang nasakit tungod sa COVID-19 nga virus.
Kasagaran sa Gabii sa Pasko, ang mga iyaan, mga uyoan, ug mga ig-agaw ni Eva mangabot alang sa dakong party. Si Eva ug Nefi dugay nga matulog. Maghimo sila og ponche (punch) uban sa ilang mga iyaan ug makigdula sa ilang mga ig-agaw. Sa tungang-gabii, ang tanan manggawas ngadto sa kadalanan, magdagkot og mga pabuto, ug magginaksanay sa mga higala ug mga silingan.
Apan karong tuiga, ang mga sakop sa ilang pamilya dili makabisita. Ug walay mga gakos sa Gabii sa Pasko diha sa kadalanan.
Si Eva naguol bahin sa tanang kalingawan nga dili niya masinati. “Ang Pasko lahi ra karong tuiga,” miingon siya.
Mitando si Papá. “Kini lahi ra. Apan si Mamá ug ako adunay ideya nga tingali makalipay ninyo.”
“Ang Pasko nagpasabot nga pagpanghatag,” miingon si Mamá. “Gusto ka ba nga motabang namo sa pagpamalit og pagkaon alang sa mga pamilya nga nawad-an sa ilang mga panimalay tungod sa bagyo?”
“OK!” Miingon si Eva. Mitando si Nefi.
Sila si Eva ug Nefi mikuyog ni Mamá sa tindahan. Si Eva mitabang og butang sa pagkaon diha sa mga bag sa grocery. Dayon nakaideya siya!
“Mamá,” siya miingon, “pwede ba nimong tabangan si Nefi ug ako nga magluto og cookies alang sa mga bata sa dangpanan? Madala nato kini kon maghatod kita sa mga grocery!”
Miuyon si Mamá. Sila si Eva, Nefi, ug Mamá migahin og pipila ka adlaw sa pagluto og cookies. Sila si Eva ug Nefi mibutang sa cookies sa gagmay nga mga plastik nga bag ug gibugkosan kini og mga ribbon. Dayon misul-ob sila sa ilang mga mask ug milakaw kuyog nila ni Mamá ug Papá ngadto sa dangpanan diin nagpuyo ang mga pamilya.
“Adunay daghan kaayong mga bata dinhi,” miingon si Nefi. “Kaigo ba kaha ang atong cookies?”
“Hinaot unta. Mag-ampo ta,” miingon si Eva. Gipiyong nila ang ilang mga mata. Si Eva hilom nga nag-ampo, “Langitnong Amahan, palihog tabangi kami aron ang tanan dinhi mobati sa Imong gugma.”
Ang mga bata sa dangpanan nagbarog diha sa taas nga linya. Sila si Eva ug Nefi mihatag sa matag bata og usa ka putos nga cookies. Kaigo ra sa tanan!
Samtang naglakaw sila pauli sa balay, si Eva wala na maguol. Mipahiyom siya og maayo. Wala siya makagakos sa iyang mga higala sa Gabii sa Pasko. Apan ang matag putos sa cookies daw sama sa usa ka gakos gikan sa iyang kasingkasing.
Sila si Eva ug Nefi mosulti sa pinulongan nga gitawag og Qʼeqchiʼ. Naghinamhinam sila nga usa ka bag-ong templo ang gitukod sa Cobán, duol sa ilang balay!
Mga paghulagway pinaagi ni Jimmy Holder