Ang mga Simbolo sa Pasko
Ania ang usa ka kalihokan sa Pasko nga mahimo ninyong buhaton alang sa gabii sa pamilya!
1
Ang Pasko mao ang usa ka espesyal nga panahon sa tuig. Kita manganta og makalipay nga mga awit. Kita magbutang og mga dekorasyon sa atong mga panimalay. Ug kita maghinatagay og mga regalo. Makalingaw kaayo kini! Apan ang mabulokon nga mga regalo ug mga dekorasyon adunay espesyal nga kahulogan usab. Kini mopahinumdom nato ni Jesukristo, sa Iyang pagkatawo, ug sa tanan nga Iyang gihatag nato. Kini makatabang nato nga mahinumdom sa tinuod nga rason nga kita nagsaulog sa Pasko.
Kantahon: “Didto sa Usa ka Kwadra” (Songbook sa mga Bata, 25)
2
Sa tibuok kalibotan, ang mga tawo adunay mga Christmas tree. Ang ubang tawo dekorasyonan ang mga kahoy sa mangga o saging. Daghang tawo ang naggamit og kahoy nga evergreen. Ang kahoy nga evergreen magpabiling lunhaw [green] sa tibuok tuig. Kana makapahinumdom kanato nga si Jesus mohatag kanato og kinabuhing dayon.
3
Ang kolor nga pula usa usab ka importante nga simbolo sa Pasko. Ang pula makatabang nato nga mahinumdom sa Pag-ula sa Manluluwas ug sa dugo nga Iyang gipaagas alang sa matag usa kanato. Makatabang usab kini kanato sa pagpaabot sa Iyang Ikaduhang Pag-anhi, kon Siya magsul-ob og pula nga kupo!
4
Ang mga candy cane kon tan-awon morag mga sungkod nga gigamit sa mga magbalantay sa mga karnero sa paggiya sa ilang mga karnero. Kini makapahinumdom kanato sa mga magbalantay sa mga karnero nga miabot aron motan-aw sa bata nga si Jesus. Kini makapahinumdom usab kanato nga si Jesukristo mao ang Maayong Magbalantay. Siya mogiya nato ngadto sa kahilwasan ug kalinaw.
5
Ang mga suga anaa bisan asa panahon sa Pasko. Mora kini og ang bitoon nga nagdan-ag sa langit sa dihang si Jesukristo natawo. Ang mga magbalantay sa mga karnero ug Maalamon nga mga Tawo misunod sa bitoon aron sa pagpangita Kaniya. Kita makapili usab sa pagsunod Kaniya.
Kantahon: “Kabitoonan Misanag” (Songbook sa mga Bata, 24)
6
Ang mga kampana bagtingon aron sa pagsulti sa maayong balita. Ang mga kampana sa Pasko makapahinumdom nato sa maayong balita bahin sa pagkatawo ug Pag-ula ni Jesukristo.
7
Ang Maalamon nga mga Tawo mihatag og mga regalo ngadto ni Jesus. Kita mohatag usab og mga regalo panahon sa Pasko. Kini makapahinumdom kanato sa tanang maanindot nga mga butang nga gihatag sa Langitnong Amahan ug sa atong Manluluwas ngari kanato. Hinumdomi nga si Jesus mao ang tinuod nga regalo sa Pasko!
8
Kami nanghinaot nga ang mga suga, mga dekorasyon, ug kalipay sa Pasko mopuno kaninyo og hingpit nga kalipay ug kadasig. Hinaot nga ang matag usa niini mopahinumdom ninyo kang Jesukristo ug sa tanan nga Iyang gibuhat alang kanato. Malipayong Pasko!
Kantahon: “Kalipay sa Kalibotan” (Mga Himno, nu. 120)
Mga paghulagway pinaagi ni Thomas S. Child