Ang Purple nga Teddy Bear
Si Liam dili ganahan sa iyang regalo sa Pasko.
Sa buntag sa Pasko, si Liam mibangon og sayo kaayo. Misulod siya sa sala uban sa iyang duha ka manghod nga babaye, sila si Holly ug Sarah. Didto, ang pito ka hinimo nga mga medyas naglinya nga gibitay. Ang uban gagmay ug lapad. Ang uban taas ug nipis. Ug ang uban daan na kaayo nga ang kolor niini kupas na. Apan ang importante nga butang alang ni Liam mao nga ang matag medyas puno sa lamian nga mga dulse.
Gikuha ni Liam ang iyang medyas ug gibubo kini. Nagmug-ot siya. Adunay usa lang ka candy cane, usa ka orange, ug pipila lang ka dulse.
“Mao ra kini?” nangutana siya.
Sila si Holly ug Sarah nanagmug-ot usab. Dayon si Liam mingisi. Tingali nagpasabot kini nga ang iyang regalo nindot kaayo! Nangandoy siya nga mao kadto ang bag-ong video game nga gidulaan sa iyang mga higala.
Apan sa dihang giablihan ni Liam ang iyang regalo, misamot hinuon ang iyang kasagmuyo. Ang iyang regalo usa ka purple nga teddy bear. Hinimo kini nga kinamot, nga adunay itom nga mga mata nga butones ug gamayng tinahi nga pahiyom.
“Maayong Pasko, Liam,” miingon si Mama nga mipahiyom.
Wala mopahiyom si Liam. Dili kini ang regalo nga iyang gusto.
Ang iyang mga manghod nga babaye nakadawat usab og stuffed nga mga hayop, ug ingon man usab ang iyang tulo ka magulang nga mga babaye. Apan wala kana gihapon makahupay ni Liam. Mao kini ang pinakabati nga Pasko sukad!
“Unsay problema?” nangutana ang iyang magulang nga babaye nga si Erin human sa pamahaw. “Nagsige ra ka og mug-ot tibuok buntag.”
“Dili gyod ko ganahan sa akong regalo,” miingon siya. “Teddy bear ra nga hinimo ni Mama. Nganong wala man ko niya hatagi sa butang nga akong gusto?”
Si Erin mipahiyom. “Dali uban nako.”
Siya midala ni Liam ngadto sa higdaanan ni Mama ug mitudlo sa daan nga makina sa pagpanahi diha sa lamesa.
“Kang Mama kana nga makina sa pagpanahi,” miingon siya. “Ngano diay?”
“Unsa pa ang imong nakita?”
Mikunot ang agtang ni Liam. Nakita niya ang mga dagom sa pagpanahi, mabulokon nga mga hilo, ug pipila ka pinilo nga mga tela. Nakita usab niya ang usa ka bag sa mga stuffing, humok ug gapason sama sa usa ka panganod.
“Kahibalo ko nga gusto nimo nga palitan ka ni Mama og laing butang alang sa Pasko,” miingon si Erin. “Apan kita walay kwarta alang niana. Ganahan ko sa teddy bear nga hinimo ni Mama alang nako. Nagpakita kini kon unsa kadako ang iyang paghigugma nako.”
“Unsay buot nimong ipasabot?”
“Dugay ang paghimo og usa ka stuffed toy. Kini nagkinahanglan og pailob. Si Mama molingkod niini nga lamesa sulod sa pipila ka oras sa paghimo og dulaan alang sa matag usa nato. Gipaniguro niya nga ang matag usa nato makadawat og regalo. Wala ba kana nagpasabot nga siya nahigugma nato?”
Gihikap ni Liam ang purple nga tela nga gigamit ni Mama sa paghimo sa iyang teddy bear. Tingali husto si Erin. Ang gasa dili kinahanglang nindot kaayo aron mahimong usa ka maayo nga regalo. Sa Primary, nakat-onan ni Liam nga si Jesus mao ang labing nindot nga regalo, ug si Jesus natawo sa usa ka yano nga kuwadra.
Si Liam midagan aron pangitaon si Mama. Si Liam migakos og maayo niya. “Salamat sa teddy bear,” miingon siya.
Wala na siya maghunahuna karon nga ang teddy bear bati kaayo. Bisan kon wala pay mga regalo, gibati niya ang gugma sa iyang pamilya. Ug mao kana ang nakapahimong espesyal sa Pasko.
Mga paghulagway pinaagi ni Debby Rahmalia