Higala ngadto sa Higala
Mga Gasa nga Ipaambit
Ni Sister Michelle D. Craig
Unang Magtatambag sa Kinatibuk-ang Kapangulohan sa Young Women
Gikuha gikan sa “Dili kaayo Makita nga mga Gasa” (Debosyonal sa Pasko sa Unang Kapangulohan, Dis. 5, 2021), https://www.churchofjesuschrist.org/study/broadcasts/christmas-devotional/2021/12-01/11craig?lang=ceb.
Ang akong lolo dugay na nga gusto motukar og violin. Apan ang iyang violin wala na magamit ug giabugan diha sa estante. Dayon iya kining gihatag nako, ug kini wala magamit sa mga katuigan diha sa akong estante. Wala gyod ko makat-on sa pagpatukar niini.
Apan ang akong apo nga babaye nga si Scarlett adunay violin nga ganahan niyang patukaron. Ganahan siya nga magkat-on og bag-ong mga kanta. Dili man niya maperpekto ang pagpatukar niini, apan siya nagbansay ug naningkamot pag-ayo. Ang iyang gasa sa musika nakahatag og hingpit nga kalipay sa uban. Ug kini mipanalangin kaniya samtang siya mihatag.
Kitang tanan adunay espirituhanong mga gasa. Kini nga mga gasa dili kanunay sayon nga makit-an. Apan ang Langitnong Amahan mohatag niini ngadto sa matag usa kanato tungod kay Siya nahigugma nato. Siya gusto nga kita mopaambit sa atong mga gasa.
Kini nga mga gasa naglakip sa pagpaminaw, paghugoy-hugoy, pag-atiman sa usag usa, dili mangita unsay sayop sa uban, ug mangayo og tabang sa Dios. Usahay wala nato hatagig bili o ipaambit ang atong mga gasa. Tingali nahadlok kita nga kini dili perpekto sumala sa atong gusto. Apan kon dili nato ipaambit ang atong mga gasa, mawala ang atong kahigayonan sa pagpanalangin sa mga anak sa Dios. Mawala ang kahigayonan nga mobati sa gugma sa Dios.
Ayaw tugoti ang mga gasa sa Dios nganha kaninyo, bisan ang Iyang gagmay nga mga gasa, nga dili magamit. Ihalad kini ngadto sa Dios ug sa Iyang mga anak. Ang mga gasa nga anaa kanato gikan sa atong Langitnong Amahan angay nga ipaambit.
Paghulagway pinaagi ni Anna Aronson