Mga Pioneer sa Matag Yuta
Si Chieko Nakat-on mahitungod ni Jesus
Dunay gibati si Chieko nga espesyal.
Si Chieko mihapyod sa iyang humok, puti nga sinina. Siya ang anghel sa drama sa Belen sa Pasko, ug ang pasundayag hapit na magsugod.
Si Chieko wala kaayoy nahibaloan mahitungod sa Pasko o ni Jesus. Ang iyang pamilya mianha sa Hawaii gikan sa Japan, ug sila mga Buddhist. Apan ang boss sa iyang amahan mihangyo kaniya nga moapil sa drama, ug siya mahinamon nga makaapil niini. Naningkamot siya nga makat-on sa mga pulong.
“Ayaw na kamo kalisang,” miingon si Chieko samtang siya nagbarog diha sa entablado. “Kay alang kaninyo natawo karon sa lungsod ni David ang Manluluwas, nga mao ang Kristo nga Ginoo.” Giganahan siya nga naapil niini nga drama.
Pipila ka tuig ang milabay, si Chieko nakahimamat sa mga misyonaryo. Gikan sila sa Ang Simbahan ni Jesukristo sa mga Santos sa Ulahing mga Adlaw. “Gusto ka ba nga moadto sa simbahan aron makat-on pa og dugang mahitungod ni Jesukristo?” nangutana sila.
Si Chieko nahinumdom sa iyang papel sa drama sa Pasko. Kinsa si Jesus? siya naghunahuna. Gusto siyang makat-on pa og dugang.
Pag-abot niya sa balay, si Chieko mihangyo sa iyang mga ginikanan kon makaadto ba siya sa simbahan uban sa mga misyonaryo. “Nganong dili,” miingon si Mama. “Basta mokuyog gihapon ka namo ngadto sa Buddhist nga templo.”
Sa simbahan, si Chieko nakat-on og bag-ong mga kanta ug nakabaton og bag-ong mga higala. Sa Sunday School, siya nakat-on nga si Jesukristo mao ang Anak sa Dios. Tungod Kaniya, siya makahinulsol ug makapuyo pag-usab uban sa Dios sa umaabot. Dunay gibati si Chieko nga espesyal. Nasayod siya nga si Jesus tinuod.
Mga katuigan ang milabay. Matag semana, si Chieko miadto sa Buddhist nga templo uban sa iyang pamilya. Ug matag Dominggo, siya miadto sa simbahan.
Sa dihang siya nag-edad og 15, si Chieko gusto nga magpabunyag. Nahadlok lang siya og gamay nga mohangyo sa iyang mga ginikanan. Apan sila misuporta kaniya. “Nasayod kami nga ikaw mahimong usa ka buotan nga anak nga babaye ug usa usab ka buotan nga Kristiyano,” miingon si Papa. Si Chieko malipayon kaayo!
Samtang nagtubo siya, si Chieko nagpadayon sa pagsunod ni Jesus. Usahay ang mga tawo dili mabination kaniya tungod kay siya usa ka Hapon. Apan si Cheiko wala motugot niana nga mopugong kaniya. Mabination siyang mitagad sa tanan.
Sa dihang nag-edad siya og 63, si Chieko gitawag nga moserbisyo isip kabahin sa Kinatibuk-ang Kapangulohan sa Relief Society. Mibisita siya sa mga miyembro sa Simbahan sa tibuok kalibotan. Gipaambit niya ang gugma sa Manluluwas.
Si Chieko namulong usab sa kinatibuk-ang komperensiya. “Moduol kita ngadto ni Kristo,” miingon siya. “Magmaya kita diha Kaniya, ang tighatag sa tanan nga maayong mga butang.”*
Ang Hawaii mao ang grupo sa mga isla sa Kadagatan sa Pasipiko. Kabahin kini sa USA.
Adunay duha ka templo sa Hawaii.
Ang bulak sa estado sa Hawaii mao ang yellow hibiscus.
Siya ug ang iyang bana, si Edward, adunay duha ka mga anak nga lalaki.
Siya usa ka magtutudlo sa eskwelahan ug prinsipal.
Atol sa iyang pagserbisyo sa Simbahan, siya mihatag og mga pakigpulong sa Iningles, Hinapon, Korean, Tongan, ug Kinatsila.
Mga paghulagway pinaagi ni Carolina Farías