Workshop sa Pasko

Ania ang pipila ka espesyal nga mga regalo nga mahimo nimong buhaton karong Pasko!

Champurradas

Kini nga cookies gikan sa Guatemala! Ania ang usa ka recipe nga mahimo nimong sulayan sa balay.

3 1/2 ka tasa nga harina

2 ka kutsara nga baking powder

1 ka pugnit nga asin

1 ka tasa nga butter, gipahumok

1 ka tasa nga asukal

3 ka itlog

sesame seeds (opsiyonal)

1. Sagolon ang harina, baking powder, ug asin.

2. Diha sa lahi nga panaksan, sagolon ang butter ug asukal. Batilon og tagsa-tagsa ang mga itlog.

3. Idugang ang sinagol nga harina ngadto sa sinagol nga butter. Kutawon hangtod masagol og maayo. Dayon tabonan ug pabugnawon sulod sa 30 minutos.

4. Paghimo og mga lingin nga dough, dayon ipalapad kini. Kon gusto ka nga dugangan og mga liso sa sesame, pahiri og itlog ang ibabaw sa matag cookie ug ibalibod ang mga liso sa sesame sa ibabaw.

5. Lutoa sa 350°F (180°C) sulod sa 20 minutos hangtod nga ang mga kilid mo-brown.

Mini Origami nga mga Bitoon

1. Paggunting og mga piraso sa papel, nga mga 8 1/2 ka pulgada (21.5 cm) ang gitas-on ug 1/2 inch (1 cm) ang gilapdon.

2. Himoang lingin ang usa ka tumoy sa ginunting nga papel sama sa usa ka ribbon.

3. Ipasok ang tumoy sa papel ngadto sa gilingin, sama sa usa ka higot. Biraha og hugot, apan pag-amping nga dili magisi ang papel.

4. Ipalapad ang mga higot ug ipasok ang tumoy sa papel ngadto sa usa sa pinilo.

5. Ang higot adunay lima ka kilid.

6. Karon iputos ang nahabiling papel libot sa porma niini. Sayon kini nga pil-on sa saktong direksiyon.

7. Ipasok ang kinaulahian nga tumoy ngadto sa usa sa pinilo.

8. Hinaya og pugnit ang matag kilid aron mobuka ang bitoon. Padayon sa paghimo og daghang bitoon kutob sa imong ganahan!

Mahimo nimong pun-on ang usa ka bag o jar niini nga mga bitoon ug modugang og nindot nga sulat aron sa pagdasig og usa ka tawo!

Paper-Plate nga Belen

Paghimo og imong kaugalingong Belen gamit ang mga paper plate! Mao kini ang mga instruksiyon alang sa Maria ug bata nga si Jesus. Sunod paghimo og Jose, mga anghel, mga magbalantay sa mga karnero, ug Maalamong mga Tawo!

1. Pil-a ang usa ka bahin sa paper plate diha sa usa ka anggulo.

2. Pil-a ang pikas nga bahin sa samang anggulo aron ang plato morag triyanggulo tan-awon.

3. Paggunting og lingin nga papel aron himoon nga ulo. Pagdrowing og nawong diha sa lingin.

4. I-tape, ipapilit, o i-staple ang ulo sa saktong lugar sa ibabaw sa triyanggulo.

Sa paghimo og bata nga si Jesus: Pil-a ang kinaubsan nga ikatulo nga bahin sa plato. Dayon pil-a ang mga kilid ug ipapilit sa saktong lugar. Paggunting og usa ka lingin aron himoon nga ulo ug drowingan kini og nawong. Ipasok kini sa ibabaw nga pinilo aron ang nawong maglili gikan sa “habol.”

Mga paghulagway pinaagi ni Mark Robison