“Te Owl ao te Orca,” Rao, Meei 2023, 8–9.
Te Owl ao te Orca
E na kanga ana korobanna Dieter ni buokiia tabeman?
E riki te karaki aei i Canada.
E tangiria Dieter n ongora n te maungatabu ni kabuta. E kataia n tekateka n rau. E kataia n ongora nakon taian marooro. Ma reken te aoraki rouna ae te autism e kangaanga bwa e na kabanea ana iango iaon te bwai teuana. E minomino iaon te kaintekateka. E takakaro ma ana bwai n takakaro. E biriaitua.
Imwiina e tara Tamana. Tamana e tekateka n rau ao e ongora nakoia taan taetae. E tangiria ni kan riki n ai aron tamana. Ngaia are e kaotinakoi ana bwai ni korotamnei. Tao karanakin tamnei e kona ni buokiia n tekateka n rau.
Ngke e tabe ni kara, Dieter e ongora nakon ana taetae Unimwaane Jeffrey R. Holland. Unimwaane Holland e karakina rongorongon Iesu. Iesu e tuanga te ataeinimwaane ae kaubwai bwa e na anganako ana mwane ni kabane nakoia kainnano.*
Dieter e tangiria ni buokiia aomata aika aki tau naba aia mwane. Ao e reke ana iango.
“Tinau, I tangiria ni beeniia tamnein te owl,” e taku Dieter. “Ko kona ni korea tamneina ibukiu?”
“Eng,” e taku Tinana. E korea tamnein te owl.
Dieter e kateboa ana burati ni been inanon tabeua been. E beeniia moa bain te owl. E karani buraena tabeua n te buraun ao tabeua n te aoranti. Ngke e been, e ongora nakon marooro ake tabeua. E ngae ngke a bane n toki marooro, Dieter e reitinako ni mwakuri. E tangiria bwa e na rokoraoi te owl.
N tokina e bane ana mwakuri Dieter. E kaota tamnein te owl nakon Tinana.
“E rang tamaroa!” E taku Tinana. “Ti na katinea?”
E ioioa atuuna Dieter e aki. “I tangiria ni kabonakoa ao n anganiia aomata ake e aki tau aia mwane. N aron are a taekinna n te maungatabu.”
E wiingare tinana. Ti a nooria bwa tera ae ti kona ni karaoia.”
E katoka tamnein ana korobanna Dieter iaonrain bwa e na kabonakoa. Tinana e korea te bwai are e taekinna Dieter bwa e na angamwane ibukiia aomata ake akea mweengaia.
N te bong are imwiina, Dieter ao Tinana a tuoa te bwai are a katoka. E a bon aki kakoaua Dieter! A mwaiti aomata aika a kan kabooa ana korobanna. E rang kukurei bwa a mwaiti aomata aika a tangiria n ibuobuoki.
Te tabo ni kaamwarake n ana kaawa Dieter e titiraki bwa e na kabooa te korobanna. A taku bwa a kona ni kabwaka 10 te tai ae raka riki nakon are a tangiria Dieter ma Tinana! Titoa ake tabeua a tuangnga naba ibukin korobanna. Dieter e a mwaiti riki ana mwakuri ae e na karaoia!
Tinana e a korei tamnein man riki aika a mwaiti, ao Dieter e kaotinakoi ana kara. E beenia tamnein te kameanti, te raian, ao te orca. E tatangira riki te orca. E aranna bwa “Otis te Orca.” Te titoa ae e uakaan ma ana auti e kabooa. Are imwiina ngke e nako Dieter nakon te titoa, e nooria n tinetine iaon te oo!
“Taraia, Tinau!” Dieter e kotea te korobanna.
“Auee!” E taku Tinana. “Ngkai n taai ake ti roko ikai, ti kona n uringnga aron am tarena ni buokiia aomata.”
Dieter e kakatonga ngkai aomata a tatangira ana korobanna. Ma e rang kukurei riki bwa e kona ni buokiia tabeman. E kukurei ngkai e a tia ni kakauongo n tain te maungatabu ni kabuta.
Kamataata n te tamnei iroun Natalie Campbell