“Ana Tataro Rosi,” Rao, Meei 2023, 14–15.
Ana Tataro Rosi
Rosi e a kua n te namakin are tiaki ngaia kain te tabo.
E riki te karaki aei i Amerika.
Rosi e kabwaka ana baekibaeki iaon te timanti. E a tibwa tia ni kabanea ana kauoua ni bong n ana kiraati ae boou. Ao e aki rang nakoraoi ana bong.
“Tera ae riki?” E titiraki Tinana.
Rosi e bwaka rawata n tekateka. “Tabeman ataein au kiraati a rawawata aia taetae nakoiu,” e taku. “Ibukin kuniu ae buraun.”
A karako aomata n te reirei aika titebo karani kuniia ma Rosi, ngaia are e namakinna bwa e riai n aki tiku ikekei. Ma kaenaenaakina e a karika riki rawawatana kanga tebubua te tai.
Tinana e taraa n raraoma. “I a kabwarabure,” e taku. E rabwata Rosi. “N na marooro ma am tia reirei ibukin anne.”
Ma n te bong are imwiina n te reirei, Rosi e a manga kaenaenaaki naba. Temanna te ataeinimwaane n ana kiraati e iowawa nakoina inanon te bong arei.
Rosi e taonnaki n te nanokawaki. Ma e namakina naba te un. N tabetai ngkana e iowawa nakoina, Rosi e kauntaeka naba. Ma e aki namakina te kabebeteaki.
N te bong teuana ngke e okira mweengana Rosi man te reirei, e biri ni kaineta ana ruu. E a kua n te kaenaenaaki. E a kua n te namakin ae tiaki ngaia kain te tabo. E rabuna matana n uningana man tang.
Tera ae N na karaoia? e iango. E aki tangira te namakin aei ni kabanea ana ririki n reirei.
E kaoi matana Rosi. Ngkanne e tararake nakon tamnein Iesu ae toka iaon nnen ana boki. Tinana e angan Rosi aei ni buokia bwa e na ururinga Iesu.
Tao I riai n tataro, e iango. E katorobubua ao e booti baina.
“Tamara arei Karawa ae ko tangiraki, I a rang n namakina te maraki inanou. Raou n reirei a rang riibuaka nakoiu ibukin kuniu ae buraun, ao I rang namakina te aki rau. Taiaoka buokai.”
E namakinna bwa e nakoraoi ngkai e tuanga Tamana are i Karawa ana namakin. E ataia bwa E ongora. E namakina te aabue ao te tangiraki, n ai aron te burangketi ae maraurau are e ramwaneaki iai. E namakinna bwa karan kunna e rang tikiraoi. Bon natin e Atua, ao E tangiria.
Ngke e bane ana tataro, e a reke ana iango. Tao e mwaiti riki te bwai ae e kona ni karaoia ae na buokia n te reirei.
Te wiiki are imwiina, Rosi ao tinana a marooro nakoia aomata ake a katabeaki n te reirei ibukin te bwai are e riki n ana kiratiruum. Rosi e tarataraia ataei tabeman n te reirei ake a bwainikirinaki ao e karikiia bwa raraona. E kataia ni katinanikua te ataeinimwaane are e bwainikiriinna. Ao n te taromauri n te Tabati, e tibwa ana koaua bwa Tamara are i Karawa e tangiriia aomata nako.
Bwaai n te reirei e aki tamaroa n te tai ae waekoa. Ma ngkana e a matoatoa, Rosi e uringa aron ana namakin ngke e tataro. Bon ngaia natin te Atua, ao e tangiraki. Ao ibukina bwa e ataa anne, e a kona ni karaoi bwaai nako.
Kamataata n te korotamnei iroun Shawna J. C. Tenney