“Rao aika a Ikotaki ni katei tamnei man beebwa,” Te Rao, Meei 2023, 30–31.
Rao aika a Ikotaki ni katei tamnei man beebwa
A kanga Ari ma raoraona ni buoka Mrs. Franklin?
E riki te karaki aei i Amerika.
“Tain te motirawa!” Ana tia reirei Ari e katanoata.
Raon reirei Ari a katei rain n otinako nakon te tabo n takakaro. Ma Ari ma raraona n tainako a nanakon te tabo n tangoboki. A tatangiria n tangoboki ao ni karaoi banna n ikotaki.
Kristin ao Ella a kaman tataninga n te mataroa. Ari e anai ana boki ao te bwariko ni beeba. Imwiina e rimoa n toua te kawai.
“Au kantaninga bwa The Dragon Keeper’s Secret e a oki!” E taku Ari. “I a kaman tangiria bwa N na tangoia ni wiiki ake imwaina.”
Ngke a roko n te tabo n tangoboki, ataeinnaine a kateitei baia nakon Mrs. Franklin, te raiburarian n te reirei. E aki toki ni butimwaiia ma te moangare ae kukurei. Ma n te bong aei moangarena e taraa n aki kukurei.
Ari e mata n aki kukurei ngke e katokai ana boki iaon te taibora. “E taraa n akoi ke e nanokawaki Mrs. Franklin nakoim?”
Kristin e kakuia angana. “Tao e bae n tabetabe.”
“Tao eng.” Ari e tekateka ao e kaotinakoa te mwakoro ni beeba. E rukumma raoi, ni kaboraoia ni waebuana.
“Tera ae tina karaoia n te bong aei?” E titiraki Ella.
“Ao e uara tao te bokimwaake?” E taku Ari. “A rang beebete. “N na kaotia nakoimi.”
Ari e a tia n reireinna aron karaoan tamnein man rukuman beebwa. Bon te tamnei mai Tiaban, are karaoaki man rukuman beeba nakon teina aika a kakaokoro. Ari e atai aron karaoan teina aika a mwaiti, ao e reireiniia raoraona bwaai ake e reiakin.
Ari e kaotia nakon Kristin ao Ella aron karaon rukurukum n aroia nako. N te tai ae uarereke ngaiia ni kateniman a toa ni bokimwaake aika a uarereke aika tikuea.
“E nakon te koona, n aron aei.” Ari e kauka ana boki ao e karina te bokimwaake ni koonan te iteraniba.
“Eti raoi!” Kristin e ana te beeba teuana. “I kan manga kataia riki i bon irou.”
Ngke a mwakuri, a taekini taekan booki ake a tia ni wareki ao ake a tangiria ni warekia imwiina. Ari e kamanna n taraa riki Mrs. Franklin. E bon taraa naba n nanokawaki teutana.
N te tai ae uarereke Mrs. Franklin e tei irarikin aia taibora.
“Mauri, ataeinnaine.” E katokai booki iaon te taibora. Bon te boki are te dragon keeper! “Aio ibukim, Ari. I ataia ae ko a kaman tataningaia ni kan warekia.”
“Ko rabwa!” Ari e anaia.
Mrs. Franklin e katinakoa te ang. “Iai ae kimoa man au kaa n te bong aei. A bane n anaaki au boki ao au katangitang anene.”
“Ai buakakara naba!” E taku Kristin.
Mrs. Franklin e moangare ma te nanokawaki. “Eng, bon tii bwaai. Bwaai a kona n oneaki mwiia. I tii kukurei bwa akea ae ikoaki.”
Ari e taraa Mrs. Franklin ngke e nako.
“Ai tera ngke arona ti kona ni karaoa te bwai teuana n ibuobuoki,” e taku Ella.
Ari e tarai bokimwaake iaon beebwa inanon baina. “Tao ti kona!”
“N aron tera?” E titiraki Kristin.
Ari e wiingare. “Rooko nakon au auti imwiin te reirei. Iai au iango.”
Te bong are imwiina, Ari, Kristin, ao Ella a nakon te tabo n tangoboki n tain te motirawa, n aron are a kakaraoia n tainako. Ma n te tai aei, aki ti uoti booki. Iai te bwai ae a uotia ae onoti ibukin Mrs. Franklin.
“Ti karaoi aikai ibukim!” Ari e angan Mrs. Franklin te baeki. “Ti ataia bwa ti aki kona n onei mwiin bwaai ni kabane ake a iraeaki, ma ti iangoia bwa aikai a na kona ni kakukureiko.”
Mrs. Franklin e taraa nanon te baeki. E onrake n rukurukum—bokimwaaken, ika, aati, bwebwe. E bubura moangarena.
“Aio e rang kakukurei! Kam rang bati n rabwa.” E katika mwakoron te beebwa man te baeki. E rukumaki kanga ai aron te boki ae uarereke. “N na kabongana te tieno ae uarereke aei ni korei ni kabane au iango ni kukurei aika a kimototo!”
E moangare nakoia Ari. E kona n tainako ni karaoa te bwai ae raoiroi ibukiia tabeman—teuana te rukuman te beebwa rukum n teuana te tai.
Kamataata n te tamnei iroun Brian Martin