“Cameron te Tia Katang Biano,” Te Rao, Meei 2023, 40–41.
Cameron te Tia Katang Biano
Cameron e babanga katangana, ma e tangiria n ibuobuoki.
E riki te karaki aei i Amerika.
“Ngai Natin te Atua,” E anene Cameron ma ataein te Moanrinan ake tabeman. E aki rangi n raoiroi ana kakauongo Cameron, ma e tatangiria n anene. Ao n te tai ae waekoa a nang bon anene n ana burokuraem te Moanrinan. Ai bon ti teuana te namwakaina ao e a roko!
Ngke e toki tain te anene, Titita Jones e karaoa te katanoata. “Ara tia biano n te Moanrinan e nang mwaing. Ti tangiriia tabeman mairoumi bwa kam na katang biano n ana burokuraem te Moanrinan. Iai iroumi ae kan katanga tekorana ke uakora?”
Cameron e katea baina. E tangiria n ibuobuoki n te burokuraem.
Titita Jones e korei araia ataei ake a tangiria ni kan ibuobuoki. “Emma. Ben. Ao Cameron! “I aki ataia ae ko kona ni katangtang.” E moangare.
Cameron e tuai n reirei mai imwaina, ma e tangiria ni karioi kuuna iaon te biano n ana auti tibuna te unaine.
“I tuai n rang ni bwaati raoi,”e taku. “Ma I taku bwa I kona ngkana I kataneiai!”
“Ko rabwa ibukin am tatauraoi ni ibuobuoki,” e taku Titita Jones. E anganiia ataei n tatabemaniia uakora kunaia bwa a na katangi.
Cameron e namakina ae kan biri rikaaki man te kawai n nakonako. E a kaman tangiria n reireinna, ao n te tai aei e nang bon karaoia!
“Ko taraa ni ingainga! Iai te bwai ae riki n te Moanrinan?” E titirakinna tinana ngke a rinnako inanon te kaa imwiin te taromauri.
E wiingare Cameron. “N nang katang biano n ana burokuraem te Moanrinan!”
“I kukurei ngkai ko kan ibuobuoki,” e taku Tinana. “Ma ko tuai raoi bwaati ni katang biano ngkana kona karaoa anne.”
Cameron e kaeta nuukana n tekateka. “I kona n reireinai. N na kabanea au tai ni kataneiai! I kona ni kabongana ana biano Tibu te Unaine.”
“Ti riai ni waaki, ngkanne!” E taku Tinana.
E buokaki iroun tinana Cameron ni kakaea ana tia reirei n te biano. Te tia reirei e kaota nakoina kawai aika a beebete ni katanga “I Love to See the Temple” ao “The Church of Jesus Christ.”
Cameron e kataneiai n tainako n aron are e kona n ana auti tibuna te unaine. E katoai rain ni katangi ni kaokiokia. E mwaiti burena, ma e teimatoa ni kataia ao e reitinako ni katangitang. N tokina e a kona ni katang kuuna ni kauoua.
N te tai ae aki maan e a roko tain ana burokuraem te Moanrinan. “Tera am namakin?” E titiraki Tinana.
Cameron e mwanoka ana boki ni biano ni katena ma bwabwaana. “Nakonnano. Ma I kukurei naba.”
Ngke e a roko n ana tai ni katangitang, e ruru bain Cameron teutana. Tamara are i Karawa, taiaoka buokai, e tataro n ana iango. E ikerake ni kamaanna. Imwiina e karaoa ana kabanea n tamaroa ni katangitang. Ataei ake tabeman a iria n anene.
N tokin te anene, e moangare. E rangi ni kaunga anne! E ataia bwa te Tamnei ae Raoiroi e buokia.
Ngkai e a tia ni katanga tekorana, Cameron e a namakina te mwengaraoi. E waakina te kauakora ni kuna. Tabonibaina a mwaing iaon taian kii n aron are e kataneiai iai.
Aio te kuna ae tatangiria Cameron. E iangoi taekaia ngke e katangitang. “I kakoaua te Tia Kamaiu, Iesu Kristo. N na karinea Arana.” E mwakuri korakora Cameron n reiakin kuuna ake n te burokuraem.
Tao katangan te biano ngaia te kawai teuana n tibwaakin au koaua, e iango Cameron.
Imwiin te burokuraem, e inga Tinana ma Cameron.
“E uara?” e titiraki.
“I nakonnano n te moantai, ma e kaunga!” E taku Cameron. E tangiria ni kateimatoa ana kataneiai ao n reiakin kuuna aika a mwaiti riki.
Kamataata n te tamnei iroun Adam Koford