“E kaonaki n te Tangira,” Te Rao, Meei 2023, 26–27.
Kaonaki n te Tangira
“Ti kona ni buokiia naba ana utu Jose?” E titiraki Marius.
E riki te karaki aei i Biribin.
Ngke Marius e rianna nakon ana auti, e kona n ongo bwanaia aomata n taetae inanona. E kaninganinga n te winto.
Ai bon antai ae mena ikai, e iango. Emaeka tinana n te aba teuana ibukin te mwakuri, ngaia are bon ti ngaia ao Lola (tibuna te unaine) ni mweengaia.
E kauka te mataroa. Nikabane raraona a mena ikekei!
“Katounako!” a taku.
“Ti tangiria ni bukamaruuiko ao am metera are ko karekea n te kaboo n te Taekwondo,” e taku Jose, raoraon Marius.
“I rang ni kakatonga iroum.” Lola e koona Marius n rabwatia. “Tinam are iaon te tareboon! I kakoaua bwa e kan ongora ni kabane taekan am metera.”
Imwiina ngke e tia n taetae Marius nakon Tinana, ngaia ma raraona a kukurei n aia bukamaru. A kakukureia ni marooro ao n amwarake ni kanan Lola ae kangkang.
“Ko kan irai n nakon te karebooro ningabong?” Jose e titiraki imwain ae e nako.
“Eng!” E taku Marius.
Te tairiki anne imwain matuna, e tataro Marius. “Tamara are i Karawa, ko rabwa ngkai ko anganai raraou aika tamaroa ao au utu. Taiaoka kakabwaia tinau ngkai e raroanako. Ao taiaoka kakabwaiaai bwa N na kukurei n te karebooro ma Jose ningabong.”
Ma n te bong are imwiina, Marius e aki reke irina nakon te karebooro. E roko buakan te karau, ao ni kabane a tiku n aia auti. E tekateka Marius ni mweengana, n ongora n rebwetatan ana kaabwa ni bwakan te karau. E iango bwa tera ngke e kona n noora Jose.
Inanon teniiua te bong, e reitinako ni bwaka te karau. E a onrake te kawai n te ran. Tabeua auti ake a uakaan ma Marius a iekaki naba.
Imwiina Marius e kaitibo ma Lola n te umwanikuuka. Iai ana kuuka ae e rang boi kangkang.
“Tera ae ko kukanna?” e titiraki.
“I kuukana te amwarake ibukiia utu tabeman n ara uoote,” e taku. “E iekaki aia auti, ngaia te bitiobi e tuangai bwa N na buokiia.”
Marius e iangoa Jose. “Ti kona ni karaoa te amwarake ibukiia ana utu Jose? A bae ni kainnanoa naba te ibuobuoki.”
“Anne bon te iango ae moan te nakoraoi,” e taku Lola.
Marius e kuukana te raiti ao e baniia te bunnimoa ibukin Jose ma ana utu. Imwiina e buoka Lola ni batiani amwarake.
N tokina e toki te karau. Marius ao Lola a nakonako inanon te kawai ae neinei n nikirii amwarake. Te ran e rokoroko ni bubuan waen Marius!
A kuneiia Jose ao ana utu n teitei i tinanikun aia auti. E tang Jose.
Marius e rabwata raraona. “I nanokawaki ngkai e iekaki am auti,” e taku. “E tangiriko Iesu!. Ao ngaira naba.”
A ikotaki Marius ao Jose ni buoka kaitiakan te bokaboka man ana auti Jose. Marius e anenea “Ngai Natin te Atua” ngke a mwakuri. Ngke a motirawa, Marius e angan Jose te amwarake are e karaoia ibukina.
“Ko rabwa ngkai ko buokiia au utu,” e taku Jose. “Ao ko rabwa ibukin te amwarake! E kangkang.”
“Teraoi,” e taku Marius.
“N am iango ko kona n tuangai riki rongorongon Iesu? Ao te kuna are ko aneneia?” e titiraki Jose.
“Eng!” E taku Marius. “Ko kan irai n nako n taromauri n te Tabati? Ikanne are I reiakina iai taekan Iesu. Ao ti kona naba n ikotaki n anene.”
“E RAOIROI,” e taku Jose.
E namakina te kukurei inanona Marius. E kukurei ngkai e kona ni buoka Jose ma ana utu. Ao e kukurei ngkai e kona naba n tibwa te euangkerio.
Kamataata n te tamnei iroun Jamie Bauza